Devance: wanted sa Gins
HUMAN usbi og pukan sa Star Hotshots, nagtuo si Barangay Ginebra coach Tim Cone nga ning higayona nagkinahanglan na gyud siya og reinforcement aron pagluwas sa Kings nga motidlom ang paglaom niini sa nagpadayon nga PBA Philippine Cup.
Gitumbok ni Cone mao ang iyang big man nga si Joe Devance kinsa wa makapakita og aksyon sukad sa pagsugod sa semifinals round human kini makaangkon og angol sa iyang wala nga tiil sa quarterfinals sa batok sa nataktak na nga Alaska Aces.
Positibo si Cone nga makaduwa na ang iyang 34-anyos nga Fil-Am sa Game Three karong gabii nga sugdan sa alas 7 ang takna diin tinguha nila nga makabangon sa series nga karon gikontrolar na sa Star Hotshots, 2-0.
“There’s a chance that Joe may finally play,” matod ni Cone, usa ka adlaw human sa ilang ikaduhang sunodsunod nga kapildihan, 91-89, batok sa Hotshots.
“His presence could help us.”
Giangkon ni Cone nga ang Kings gilupig gyud sila sa Hotshots sa naghinapos nga bahin. Iyang gipasabot nga ang iyang kanhi team nga Hotshots nga iyang nagiyahan ngadto sa lima ka kampyonato, dili maratol sa higayon nga anaa na sa krusyal nga sitwasyon ang duwa.
“Bottom line is that Star has beaten us down the stretch,” matod niya. “In both games, they executed and got rebounds. We didn’t.”
Sa Game Two, ang Ginebra milupig sa Star sa rebounding department, 46-34, apan ang nakapasagmuyo nila mao ang rebound sa beteranong si Rafi Reavis sa sipyat nga jumpshot ni Paul Lee, ug ang pagkombirter sa iyang duha ka free throws nga maoy nagsilyo sa ilang kadaugan.