OKC THUNDER GIMASAKER
NAGPAKATAP og 34 puntos si Kevin Durant sa iyang emusyonal nga pagbalik sa Oklahoma City aron agakon ang Golden State Warriors ngadto sa dominasyon batok sa host Thunder, 130-114, kagahapon sa National Basketball Association (NBA).
Si Durant, kinsa mibiya sa Oklahoma sa miaging tuig, gi-boo sa mga sumosunod sa Thunder gikan sa pre-game introductions hangtod na sa katapusang gutlo.
Apan wala nagpaapekto si Durant niini ug niposte kini’g 12-of-21 fieldgoal aron pangulohan ang Warriors nga makasaka sa 46-8 nga rekord.
Ang Splash Brothers nga sila si back-to-back MVP Stephen Curry ug Klay Thomspon ningmugna og 26 puntos matag usa aron suportahan si Durant.
Sama sa naandan, nagbangis na sab si Russell Westbrook ug nakahimo kini’g 47 puntos ug 11 rebounds apan kuwang ang suporta nga iyang nadawat hinungdan sa dakong kapildihan sa Thunder.
Si Victor Olapido nidugang og 20 puntos alang sa Thunder, nga nangahagbong sa 31-24 nga rekord.
“For us this was very, very similar to what we’ve experienced in the playoffs,” matod ni Curry.
“It wasn’t anything new for the guys that have been in this visiting locker room before and played a meaningful game.”
Nagkagrabe ang tensyon sa kombati sa ulahing bahin sa 3rd quarter diin nagbinayloay og mainit nga mga pulong ang kanhi managhigala nga sila Durant ug Westbrook paingon sa usa ka timeout.
Gisinggitan ni Westrbook si Durant og “I’m coming” ug gitubag kini ni Durant og “You’re going to lose.”
Pipila ka mga minutos gikan niini, gi-foul og kusog ni Thunder forward Andre Roberson si Durant atol sa iyang pag- layup.
Sila na sab ni Roberson ug Durant ang nagkasumpaki.
Gisugdan sa Warriors pagdominar ang duwa sa 2nd quarter dihang nagsugod na og paghakot og mga puntos si Durant nga nagpahilom sa 18,000 ka mga dumadapig sa Thunder.