OSMEÑA DI MOSWELDO

Sa mga tanod, loaders sa 80 ka Cebu City barangays

GIPUTOL ni Mayor Tomas Osmeña sugod Pebrero 1 ang honorarium nga gihatag sa Cebu City Government ngadto sa libuan ka mga garbage loaders ug barangay tanod sa 80 ka mga barangay sa dakbayan sa Sugbo.

Ang usa ka pahina nga memorandum ni Osmeña pinetsahan og Enero 24, gipadala sa matag barangay aron ipahibawo ang lakang sa mayor gumikan sa kakuwang sa pundo sa dakbayan.

“Please be informed that effective February 1,2017, the City Government of Cebu will no longer provide honoraria to barangay tanods and garbage loaders due to budget limitations,” matod sa memo ni Osmeña.

Si Konsehal Phillip Zafra, presidente sa Association of Barangay Councils ug kapitan sa Barangay Tisa, nagkanayon, di siya makatuo sa gihimong basehan sa mayor nga way budget.

Iyang gipadayag nga mangayo siya og explanation sa City Budget Office kon nganong way pundo ang Siyudad alang niini nga unta dugay na ang maong programa nga gisugdan atol sa administrasyon ni kanhi Mayor Michael Rama.

“Mangayo ta og clarification kay dili ni maayong tilimad-on kay ang atong mga tanod ug garbage loaders, dako kaayo nag tabang sa operation sa city, dili lang sa barangay hilabi na ang pagkolekta sa basura kay dili man na maato sa siyudad,” matod ni Zafra atol sa interbyu sa Superbalita Cebu.

“If and when dili na mapangitaan og paagi ug matangtagang gyud na, chances are mangundang gyud ning atong garbage loaders ug mga tanod,” butang nga gikabalak-an ni Zafra.

Si Kapitan Ramil Ayuman sa Barangay Apas wa mabalaka sa bag-ong lakang ni Osmeña sa barangay sanglit makahatag sila og husto nga honorarium.

Apan ang iyang gikabalak-an mao ang gagmay nga mga barangay nga tua sa kabukiran.

“Kining pagpanggukod aning Tomas, ambot kanus-a ni siya gaba-i. Ako motuo ra ba gyud ko nga aduna ray karma nga moabot ani niya nga kami gusto unta mi mo- reach-out nga magtinabangay ug ihikling una ang pulitika,” padayag ni Ayuman.

Si Kapitan Michael Gacasan sa Guadalupe ug kaalyado ni Osmeña nagkanayon nga kon unsay kabubot-on sa mayor, maoy ilang sundon.

“Wa pako kahibawo ani pero kon unsay desisyon sa mayor wa tay mahimo kay siya may nagda karon sa siyudad ug sila man ang nagdala sa budget kay basin naay lain dapatan ana nga budget,” nagkanayon si Gacasan.

Ang 80 ka mga barangay sa Siyudad adunay labing menos tag 20 ka mga tanod kun 1,600 ka mga tawo nga nagdawatan og tag P4,000 kada buwan isip cash incentive gikan sa Siyudad.

Wa kini labot sa mga garbage loaders nga nagdawat og samang kantidad.

Ang mga dagko nga barangay sama sa Apas nagdawatan ang ilang tanod karong tuiga og P6,500 kay ila nang gipangandaman ang maong lakang ni Osmeña samtang ang ilang loaders nagdawat og P5,000 matag buwan.

Sa Tisa, tag P2,000 ang ilang tanod ug P1,000 ang loaders.

Ang Guadalupe nga maoy labing dako nga barangay, nagsweldo ang ilang loaders og P5,200 ug P4,600 ang mga barangay tanod matag buwan.

Ang honorarium sa mga tanod ug loader gikan sa barangay magdepende sa annual budget sa matag barangay.