Recruitment agency gi-entrap sa DOLE,

USA ka recruitment agency ang gipaubos sa entrapment operation sa Department of Labor and Employment (DOLE)-7, inabagan sa Criminal Investigation and Detection Group (CIDG) kagahapon sa buntag.

Kini human nga nakadawat og daghang reklamo ang ahensiya batok sa FelJobs Manpower Services, nga anaa mahimutang sa brgy. Pusok dakbayan sa Lapu-Lapu.

Matod ni Atty. Roy Buenafe, pangu sa Mediation Arbitration and Legal Service Unit (MALSU) sa DOLE-7, nga ang Feljobs nisaad sa ilang mga aplikante nga hatagan sila og trabaho, apan ang uban kanila, duha ka tuig nang nagpaabot apan wa pa gihapo’y trabaho.

Nangolekta usab ang recruitment agency og P850 gikan sa ilang mga aplikante alang sa identification (ID) card nga tag P300 ug medical examination nga tag P550.

Atol sa entrapment, duha ka mga babaye ug usa ka lalake nga pulos empleyado sa recruitment agency ang nasikop.

Wa hinoon atol sa operasyon ang tag-iya sa kompaniya diin kada adlaw, moabot sa P11,000 ang makolekta sa Feljobs sa ilang mga aplikante.

Nagsugod ang reklamo human nga usa ka wa magpailang tawo ang nipadala og e-mail sa ahensiya labot sa ilegal nga operasyon sa FelJobs.

Sa dihang ilahang gi-search sa Facebook ang recruitment agency, didto ilang nakita ang daghan pang reklamo batok niini.

Gawas sa dakbayan sa Lapulapu, nasayran nga dunay branch sa Mandaue City ug Cebu City ang recruitment agency.

Apan gisirad-an na ang branch niini sa dakbayan sa Sugbo samtang lain og ngan ang branch niini sa Mandaue City nga mao ang Fit To Job.

Base sa record sa ahensiya, 2012 sa dihang nahatagan og license to operate ang FelJobs, apan niadtong 2014 na-expire na ang lisensya ug hangtod karon, wa na mo-renew.

Tungod niini, giandam na sa DOLE7 ang kamanduan, alang sa hingpit na nga papasira sa recruitment agency diin did-an na kini nga subling makaoperate.

Apil usab nga pakasuhan sa ahensiya ang mismong tag-iya sa kompaniya, diin giawhag usab ni Buenafe ang uban nga nabiktima sa recruitment agency sa pagpatim-aw ug pagduaw sa DOLE7 aron sila ma-facilitate.

Gawas sa FelJobs, laing upat ka mga recruitment agency ang ilang gimonitor tungod sa mga nadawat nga reklamo, diin ang usa niini ang kumpirmado nga way lisensya.

Giawhag usab niini ang mga aplikante, nga susihon daan ang recruitment agency nga ilang gi-aplayan kun kini lisensyado ba pinaagi sa pagduaw sa ilang website ug pagtawag o personal nga paduaw sa ilang buhatan.