PDEA giakusahang `nagpalabi, nangawat'

NIPASANGIL ang pamilya sa kanhi konsehal sa barangay Poblacion 3, siyudad sa Carcar nga napatay sa mga sakop sa Philippine Drug Enforcement Agency 7 atol sa buy bust operation niadtong Lunes nga nigamit kini og sobrang pwersa.

Ang kamaguwangang anak ni ex-councilor Elmer Padin nga si Jomer, 27, nireklamo sa gihimo sa mga operatiba sa PDEA 7 atol sa anti drug operation nga miresulta sa kamatayon sa iyang amahan.

Matod ni Jomer nga sa pagabot sa mga sakop sa PDEA sa ilang balay, kini nisulod nga way gipakita nga search warrant o warrant of arrest ug nimando sa pagpagawas sa tanang mga tawo sa sulod.

Iyang gihulagway nga gidiretso og pusil sa mga ahente sa PDEA ang iyang amahan bisan kon wa nimisukol sukwahi sa una nilang pamahayag nga suway ning namusil sa mga agent.

“Gidiretso rag patay. Bag-ohay pa sila naabot, gipagawas ra nila akong mama pagawas. Gibitad pa nila akong mama pagawas. Gipangitaan pa sila og warrant sa akong mama. Giingnan nga asa man inyong warrant. Unya ila pang giingnan nga hilom dira, unsa man apilon tika? Nya tarong diay na?,” matod ni Jomer.

Lakip sa gipasangil batok sa mga ahente sa PDEA nga nanguha kini sa kwarta nga halin sa ilang kompyuteran ug ang tinigom niini nga sobra sa P100,000 sa negosyo sa ready-to-wear (RTW) g pautang nga cellphone sa iyang inahan.

“Daghan baya kaayo silag gipanguha diri mga halin sa computeran, mga kwarta ni mama nga tinigom mga kwarta ni mama nga gikan sa pinaningil bitaw niya sa merkado? Ila pang gikuha tanan mga butang namo,” dugang ni Jomer.

Giangkon niya nga mogamit og illegal nga drugas ang iyang amahan apan miundang na kini ug hugot nga gihimakak ang pasangil nga kini namaligya.

DI TINUOD

Hugot nga nanghimakak si PDEA-7 Director Yogi Filemon Ruiz sanglit atol sa pag-abot sa iyang mga sakop miaksyon na og bunot sa iyang armas si Padin nga naa sa iyang hawak.

Ang pasangil nga nanguha og dakong kantidad sa kwarta ang iyang mga sakop iyang gihulagway nga sobra ra ug di mahimo sa operatiba sa PDEA-7.

Apan alang kang Ruiz, di na kini bag-o alang kanila sanglit kanunay na kining ipasangil sa mga nagbuhat og ilegal kon sila madakpan ug mapatay sa anti drug operation.

“That is too much. Makabantay ta usahay ning mga iligalista maoy kusog kaayong mamasangil. Di man diay mo gustog maingon ana ayaw mo pag apil og illegal. Mao ra gyud nay atoa,” matod ni Ruiz.

Nalakip na sa kapulisan ang pangan ni Elmer sa high value target sa dakbayan sa Carcar.

Duna pay laing duha ka barangay opisyal apan wa una gipahibawo sa PDEA kon asa nga lugar.

NAKAHIBAWO

Nibutyag si Carcar City Mayor Nicepuro Apura nga tulo ka mga opisyal sa ilang siyudad ang iyang nahibaw-an nga dunay kalambigitan sa ginadili nga drugas.

Apan, wa siya motug-an kon unsa ang mga position niini.

Ang mayor nitug-an nga nakadungog siya bahin sa kalambigitan sa illegal drugs sa napatay nga kanhi konsehal sa Poblacion 3 nga si Elmer Padin.