Langay mobayad sa Philhealth silotan

DOS porsiyento nga multa matag buwan ang ipahamtang sa Philippine Health Insurance Corp. (PhilHealth) ngadto sa mga employer kon delayed ang pagbayad niini sa kontribusyon sa ilang mga empleyado.

Mao kini ang pahimangno karon sa PhilHealth alang sa ilang kapin 40,000 ka mga employer sa Central Visayas.

Matod ni Laarni Joy Allanic, Chief Social Insurance Officer sa PhilHealth 7 Collection Section, nga base sa ilang rekord, minus kaayo ang madelay og remit sa ilang kontribusyon sa PhilHealth ang employer sa Central Visayas.

Sa pagkakaron aduna’y natala nga kapin 6 milyones nga mga miyembro ang PhilHealth sa rehiyon siete lang

Dugang ni Allanic nga niadtong milabay nga tuig aduna’y security agency ang napahamtangan nila sa maong multa.

Tungod kay Electronic Premium Remittances System ang gamit nila hinungdan nga automatic kini nga mapuno sa Statement of Premium Account sa matag employer.

Tuig 2002 dihang gisugdan ang maong pamaagi ug Abril 2013 dihang gireimpose kini.

Apan niadtong miaging tuig lang pinaagi sa PhilHealth Circular 20160034 kon ang Compounded Computation of Interest and/or Surcharges on Delayed Employer Remittances, mas gipahugtan pa ang maong pagpatuman.

Epiktibo Enero 2017 dihang hingpit kini nga gipatuman sa PhilHealth.

Dugang ni Allanic nga aduna usab sila’y nadawat nga reklamo sa ilang buhatan nga aduna’y empleyado nga wala makapahimulos sa benepisyo sa PhilHealth diin wala moremit ang empleyor.

Apan dugang niini nga andam sila nga motabang sa mga miyembro nga nakasinati og ingon niini.

Dugang niya nga kon aduna’y reklamo mamahimo nga mobisita sa ilang buhatan ug magdala kini’g company id ug pay slip isip pagpamatuod nga nadeduct kini sa ilang suholan.

Exempted hinuon sa maong bagong pamaagi ang employer sa mga katabang o kasambahay.

Gipahibawo usab nila nga mamahimong makita online sa ilang website ang updated contribution sa employer alang sa matag kawani.