Osmeña ug Alcover puwede mag-uban?

PARA nako, anaa pabor sa katawhan kon moabot sa punto nga mag-uban sila si Cebu City Mayor Tomas Osmeña ug Konsehal Jun “Way Kulba” Alcover.

Dili sab lisud takdoon ang karsada aron magkauban sila si Osmeña ug Alcover kay pareho man sila og katuyoan aron matubag ang panginahanglan sa katawhan.

Si Alcover naila nga kritiko ni Osmeña ug kaalyado sa Team Rama. Apan ang tinubdan sa Agila nag butyag nga si Alcover maoy tinuoray nga independenteng konsehal sa dakbayan.

Pagmatuod, matud pa, wa kini mohurar kuyog sa Team Rama sa Partidong Demokratikong Pilipino (PDP-Labaw) ni Presidente Rodrigo Duterte.

Si Alcover, kanhi kongresista ubos sa ANAD Partylist, maisip nga “game changer” kon mag-uban sila ni Tomas.

Bintaha nila ni Tomas ug Alcover, labaw sa tanan ang katawhan kay mapatuman na sa hingpit ang mga proyekto nga ilang gikinahanglan.

Gawas niini, way personal nga away si Tomas ug Alcover nga matawag nato nga puro konstraktibo ang ilang mga komentaryo may labot sa isyu sa city hall.

Kon atong ibutang nga ibutang ni Osmeña si Alcover nga deputy mayor sa mountain barangay, panahon na ang paglambo sa kana rana sa kabukiran nga kanunayng mauwahi sa kalamboan.

LINOG

Nagbangutan karon ang katawhan nga gumikan sa kamatayon sa walo ka mga tawo ug gatusan ang nangaangol sa 6.7 magnitude nga linog sa Surigao City.

Tungod niini, subling gihimangnoan ang katawhan sa Manila sa pagpangandam sa posibling pag-igo unya sa Big One. Ang gikahadlukang kusog nga linog nga moresulta unya sa kamatayon sa gatusan ka libo ka mga tawo.

Matumba ang mga building, dunay sunog ug uban pang mga panghitabo nga may kalambigitan sa makalilisang nga linog nga maoy maka pabo-ak ug duha sa Manila.

NAGPASALAMAT

Mipadayag sa iyang kalipay si Provincial Board Member Tata Salvador, chairman sa committee on Senior Citizen ug vice chair sa Committee on Health sa paghatag og usa ka milyon nga financial assistance sa probinsiya sa Sugbo pinaagi sa pagpasar sa resolution.

Si Salvador, usa ka rehistradong nurse, maoy responsabli sa libreng ambulansya alang sa mga pobre nga pasyente ug pagminos sa sakit nga dengue sa ikaduhang distrito tungod sa halapad nga dengue awareness program mitug-an atol sa interview sa Agila, dinalain ang panginahanglan sa mga biktima sa linog.