Second fiddle
NAG-ANGAY si Treb sa iyang biyolin ning taknaa sa kagabhion, iyang pangandam alang sa duyogan nilang ‘concert’ ugma sa gabii sa Waterfront Hotel sa Lahug, siyudad sa Sugbo. Konserto kini ni Ellen Villar, usa ka Sugboanong mag-aawit nga nahimong ‘grand champion’ sa Tawag ng Tanghalan, tigi sa awit nga gipasiugdahan sa ABS-CBN sa Manila. Miyembro siya sa D’LUMAD ORCHESTRA. Kahibawo sab siya motugtog ‘oido’ sa piyano kay duna man silay piyano sa balay, kabilin sa mitaliwan na niyang amahan nga usa ka musikero nga maoy nagtudlo kaniya. Siya ug si mama niya Merlyn na lay nagpuyo karon sa ilang balay kay ang maguwang niyang babaye, si Alma, naminyo man og German ug tua na manimuyo sa Germany. Dili gyud ang pagka musikero ang iyang ‘main livelihood.’ ‘Dealer’siya sa usa ka pabrika sa ‘beer.’
Si Treb ug si Ellen daan nang managkaila kay miyembro sila sa Glee Club sa Abellana niadtong hayiskol pa sila. Maayo mokanta si Ellen ug nindot siyag tingog. Sa iyang bahin, si Treb niadtong higayuna nagtuon pagtugtog sa biyolin ubos ni Petring Ylaya, usa ka tadhang biyolinista. Sa kolehiyo nagpadayon ang ilang panaghigalaay. Kanunay moadto si Treb sa balay nilang Ellen aron duyogan sa piyano ang dalaga nga mag-awit. Sa mga pista sa mga barangay nga sakop sa siyudad kanunay makadaog si Ellen sa ‘amateur singing contest.’ Misugyot si Treb kang Ellen nga moapil sa Tawag ng Tanghalan. Nakapasar si Ellen sa ‘audition.’ Sa Manila nahimo siyang semi-finalist ug finalist. Ug sa ‘finals’ siya ang gi-kuronahang ‘grand champion.’
Usa ka adlaw dihang nahuman nag repaso si Ellen sa awit nga iyang kantahon sa Tawag may gisulti si Treb kang Ellen.
“Len, duna koy isulti nimo. Ayaw lang kasuko, ha?” ni Treb nga mitutok sa dalaga. Diha sila manglingkod sa sopa atbang sa piyano nilang Ellen human sila mag-esnak.
“Unsa man na, Treb? Ug nganong masuko man kuno ko?” ni Ellen.
“Hibawo ka, Len, ang akong pagdayeg nimo nadebelop,” ni Treb. “Gibati kog gugma nimo. I love you, Len!”
Wa makatingog si Ellen. Nahimut-okan siya. Wa siya magdahom sa gipamulong ni Treb. Misantop sa iyang hunahuna si Kevin, soloist sa Pinasugbo Band, nga iyang uyab.
“I’m sorry, Treb! Di na nako madawat ang imong gugma. Duna na koy uyab, si Kevin. Nakaila ka kaniya.” ni Ellen nga nasubo ang nawong. “Pero magpadayon ang atong hinigalaay.”
Si Treb na say wa makatingog. Karon pa siya masayod nga managtrato diay sila Kevin ug Ellen. “Okey, Len. Let’s just be friends. Pero unsa ugaling mahitabo, come to me. Tabangan tika sa imong problema.” Unya nanamilit siya. Gibesobeso siya ni Ellen una siya molakaw.
PAGKASUNOD gabii daghan ang mga tawo nga nanan-aw sa ‘concert’ ni Ellen. Didto si Treb sa iyang puwesto sa orchestra isip ‘violinist.’ Nagpadayon pagduyog ang orchestra sa mga awit ni Ellen. Wa masayod si Treb nga wa motan-aw si Kevin sa ‘ concert.’ Human sa ‘ concert’ giadto ni Treb si Ellen sa dressing room ug gipahalipayan. “Congrats, Len! It’s successful!”
“Thank you, Treb!” ni Ellen nga mitibi ang baba; kahilakon siya. “May nagbudhi nako!”
“Unsay buot mong ipasabot, Len?” Milakra sa nawong ni Treb ang kahingangha.
“Gitaban ni Kevin si Junifer, akong ig-agaw, kagahapon!” ni Ellen nga mipunit sa iyang selpon gikan sa tokador. Giablihan niya ang ‘Inbox.’ “Nia, o. Basaha ang teks ni Cedes, iyang igsuon.” Gibasa ni Treb ang mensahe ni Cedes.
“Ah, ayaw lang na ikaguol pag-ayo, Len. Sayod ka nga may lain pang lalake nga nahigugma nimo sa tiunay. Ug kana mao ako. I love you! And I don’t mind playing second fiddle to your love, if you just let me,” ni Treb nga migunit sa duha ka kamot ni Ellen. Wa damha, gigakos ni Ellen si Treb.
“O, Treb! Gawasnon na ko.” ni Ellen nga mihilak. “I’m free to love again!” (KATAPUSAN)