To live with you
(Una sa pito ka mga gula)
GIKAN sa simbahan, nanulod mi si Greg sa Jollibee. Misa sa alas nuybe sa buntag ang among gitambongan. Lapas na sa alas diyes nga nahuman ang Misa. Duol ra ang Jollibee sa Sto. Rosario church nga among gisimbahan.
Naghinungitay mi si Greg sa pagkaon. Ingon mi ani ka-loving ug ka-sweet. Parehas mi, nagpuyo mi sa gugma para sa usag usa namo.
“Unya ra ta manguli, ha, Greg. Laay sa ba’ay. You know na bitaw nga sila si Lola ug Lolo ra ang akong mga kauban. Aw, duna man tuod mi katabang, pero tiguwang gihapon. Boring, uy.”
Mipahiyom si Greg. Miyangu-yango siya. Aw, parehas man sab ming duha. “Di kay ikaw ra anang sitwasyona, uy, Carmie. Ako sab.” Nakapahiyom ko kay gipislit ni Greg ang lamurok kong aping. Bitaw sab, uy. Morag nagkaprehas gyud ang among kapalaran ni Greg. Ang tagsa-tagsa namo ka mga ginikanan tua manarbaho ug mamuyo sa laing nasod. Parehas pa gyud ming bugtong anak si Greg. Pulos nurse ang parents ni Greg ug dugay nang namuyo sa Amerika. Di man sab gusto ang akong boyfriend nga mopuyo didto maong gibilin siya sa iyang Lolo ug Lola.
Ug ako, aw, sa akong mga apohan sab gibilin nila ni Mama ug Papa kay di man sab ko gustong mopuyo sa Canada. Parehas nga doktor ang akong mga ginikanan. Dugay na sab silang namuyo ug nagtrabaho sa Canada. Wa man sab sila mamugos nako nga moadto sa Canada.
“Bitaw sab ning atong kinabuhi, uy, Greg. Kita gyud tingali ang gitakda sa panahon, uy.” Mikidhat ko. “Aw, kon ikaw ang akong destiny, agwantahon ko na lang.” Nakatig-ik si Greg kay gikusi ko siya sa iyang kilid. Unya nagkinataw-anay mi. Ingon mi ani kon magkauban. Pulos kalipay ang nia sa among hunahuna ug kasingkasing. Compatible man sab mi. Ang akong likes ug deslikes, likes ug delikes sab ni Greg. Mao sab ko ngadto niya.
Human mi maniudto, aw, paniudto na gyud kay udto na man, nangadto mi sa SM. Nagpabugnaw mig ice cream. Ug sa pagpangabli na sa sinehan, nanan-aw mi. As usual, sa balcony mi manglingkod. Giagbayan ko ni Greg. Misandig ko sa iyang dughan. Unya gihagkan niya ang akong lips. Dugay-dugay gyud nga gipahimuslan namo ang higayon. Wa sa among hunahuna ang salida nga among gitan-aw, kondi nanulod mi sa sinehan aron ikapagawas namo ang among pagminahalay.
Parehas ming malipayon si Greg. (SUMPAYAN)