Gins nakabawos

NIMUGNA og 11 ka sunodsunod nga puntos ang Brgy. Ginebra Gin Kings sa 4th quarter aron bawsan ang Star Hotshots, 73-62, niadtong Lunes sa gabii sa Game 3 sa ilang best-of-seven finals series sa Philippine Basketball Association (PBA) Philippine Cup sa Mall of Asia Arena.

Ang kadaugan sa Gin Kings maoy nakapahak sa labaw sa Hotshots sa series, 2-1.

Gikan sa 59-60 nga biya, ang Gin Kings kalit lang ningpabulhot sa ilang opensiba aron pagposte og 71-60 nga labaw sa hinapos nga bahin nga maoy nakaabli sa ilang pultahan paingon sa kadaugan.

Nagkumboya sila si Sol Mercado, Japeth Aguilar ug Mark Caguioa sa pagmugna ning maong rally nga nagsugod sa nahabiling 5:23 minutos.

“We hit some shots. I think that was the big difference maker,” matod ni Ginebra coach Tim Cone.

“We hit some shots when we needed to, and that’s something that we didn’t do in the first two games.”

Gawas sa opensa, ang Gin Kings nakapakita sab og maayo sa depensa. Wala nila gipapuntos ang Hotshots dul-an sa lima ka mga minutos.

Ang 62 puntos sa Hotshots maoy labing ubos nga namugna sa usa ka team sa katapusang lima ka mga komperensya.

“The good news is we’re back in the series right now,” asoy ni Cone. “We’re not even, but we’re back in.”

Gipangulohan ni Mercado ang kadaugan pinaagi sa iyang 16 puntos samtang nidugang og 15 puntos ug 13 rebounds si Aguilar.

Ang Hotshots gipangulohan ni Marc Pingris pinaagi sa iyang 12 puntos.

Magsangka og balik ang duha ka mga kampo karong gabii alang sa Game 4 sa series. Puntos matag usa Ginebra (73)- Mercado 16, Aguilar 15, Caguioa 8, Tenorio 7, Thompson 7, Ferrer 6, Devance 6, Cruz 3, Marcelo 3, Ellis 2

Star (62)- Pingris 12, Melton 8, Jalalon 7, Lee 7, Barroca 6, Sangalang 6, Simon 5, Maliksi 4, Reavis 3, Abundo 2, Dela Rosa 2.