Arum napalaw

SA sayong bahin ning buwana, lanog nga gipahibawo ni Bob Arum, ang promoter ni Manny Pacquiao, nga sa Australia ang sunod away sa Pambansang kamao. Kini human iya usab nga gikompirmar nga ang Australian fighter nga si Jeff Horn maoy makontra sa Filipino boxing icon.

Daghan ang nahingangha sa anunsyo ni Arum nga si Horn maoy iyang giparang ni Pacquiao tungod kay gawas sa kalinghod niini wa man kini igong abilidad nga maingon nato makasurprisa ni Pacquiao.

Ang rekord ni Horn (16-0-1, 11KOs) nagpamatuod sa iyang kahilaw pa nga makigkombati ni Pacquiao nga gawas sa 596-2, 38 KOs nga baraha mga dekalidad pa gyud ang lakip sa gipangpildi niini.

Gihangop sa kampo ni Horn ang anunsyo ni Arum ug wa kini mag-usik og panahon ug mihimo gilayon kini og mga lakang aron mahinayon ang away. Pero mura man og napalaw si Arum sa iyang sayong pabuhagay kay hasta si Pacquiao wa sab mahimuot sa gihimo sa iyang longtime promoter.

Mura man og naglawog si Arum og bani sa saging ngadto sa usa ka high-breed nga baboy Niadtong Dominggo, human sa iyang pabuhagay nga sa United Arab Emirates ug dili sa Australia ang iyang sunod nga away, miluwat na usab siya og laing pamahayag pinaagi sa iyang twitter account.

Ning higayuna, naghimo na gyud siya og survey ngadto sa iyang boxing fans kon kinsa ang gusto nilang iyang makontra? Upat ang gipapilian, lakip ni Horn.

Pero kahibawo mo og unsay resulta sa survey? Kaluoy sa Diyos, si Horn 7% ra ang nakuha sa 44,815 ka mga mipili pinaagi sa online. Nag-una mao si Amir Khan nga may 48%, sunod si Kell Brook (24%) ug dayon si Terrence Crawford nga may 21%.

Layo ra kaayo si Horn. Kaniadto kon unsay tingog ni Arum, mao kini perming sundon ni Pacquiao. Pero karon lahi na. Buot ba ipasabot nga wa nay pagsalig si Pacquiao ni Arum?

Kini karong gihimo ni Pacquiao daw sa nagsuporta sa unang gibutyag ni Michael Konz, ang chief adviser ni Pacquiao, nga adto sa UAE ang sunod away ni Pacquiao ug ni Horn.

Pero ning bag-ong kalambuan, mora og mihanap na sab nga si Horn maoy makontra sa Filino boxing star, bisan pa man tuod og malaumon gihapon ang Australian promoter nga si Dean Lonergan sa Duco Events nga ilang madala ang away sa Australia.

******** By the way, nagpadayon diay karon ang Valentine’s Challenge Cup 10-Ball tournament diha sa Kiosk 8-Ball Billiard Hall sa Osmeña Boulevard, dakbayan sa Sugbo.

Kini salmotan sa mga Sugboanong tirador kinsa mopahanas sa ilang abilidad pinaagi sa pagsalmot sa mga ginagmayng torneyo nga sama niini. Gawas sa cash prize duna say tropeyo sa makampyon nga maisip nga iyang handumanan ning adlaw sa pagminahalay o Valentine’s Day.

Karong Sabado, dili usab nato kalimtan ang Cebu Extreem Fight League II: “No Way Out Arts” diha sa Cebu Coliseum nga gipaabot usab nga hugopan sa mga mahiligon sa mixed martial arts nga maoy karon ang gikabuangan dili lang dinhi sa Pilipinas kon dili didto sab sa Amerika.

Saktong kombati maoy madalit ning maong promosyon nga gipangulohan ni Master Sir Ekin Caniga. Goodluck, guys.

(junmigs0622@yahoo.com)