Sunod away ni Manny sa UAE

GIKOMPIRMAR ni Manny Pacquiao nga sa United Arab Emirates (UAE) ipahigayon ang sunod niyang away ug dili sa Australia.

“Sa UAE yung fight natin by April. Hindi pa talaga fixed yung date, malamang mga third week of April. Hindi pa alam,” matod ni Pacquiao sa interbyu sa GMAnews.TV.

Nagkanayon ang fighting senator nga padayon pa ang negusasyon sa kampo ni Australian fighter Jeff Horn, kinsa maoy posible niyang mahimo nga kontra.

Sa pangutana kon giunsa niya pag-andam ang iyang kaugalingon alang sa sunod niyang away taliwala sa iyang gimbutahon sa Senado, ang Pambansang Kamao sa Pilipinas nagkanayon: “Nag-e-exercise ako hanggang ngayon...That’s discipline and time management.”

Sa miaging adlaw, si Pacquiao migamit sa Twitter aron pangutanon ang boxing fans kon kinsa angayan niyang kontrahon alang sa sunod niyang away.

“Who do you want me to fight next in the UAE?” tweet sa Pambansang Kamao sa Pilipinas human nanggawas ang nagkabangi nga taho kabahin sa venue sa sunod away ni Pacquiao. Adunay taho nga sa UAE ug aduna sa’y taho nga Brisbane, Australia.

Ang pilianan mao sila si Amir Khan, Jeff Horn, Terence Crawford, ug Kell Brook.

Sa inisyal nga 10,000 nga ningbuto, si Khan maoy nakakuha sa labing daghang mga boto diin nakabira siya og 47%.

Si Horn, kinsa usa ka Australian ug maoy giingon ni Top Rank boss Bob Arum nga adunay dakong poruhan nga ikaharong ni Pacquiao, igo lang nakakuha og 5%.

Ang pamahayag ni Pacquiao nakapalig-on sa gianunsyo sa iyang adviser nga si Michael Koncz nga sa UAE ipahigayon ang sunod away sa Filipino boxing icon.

Apan ang promoter ni Horn nga si Dean Lonergan sa Duco Events nagkanayon nga padayon silang mosuway nga mapahigayon ang away sa Australia hangtod nga wala pa’y pinal nga pamahayag si Arum.

“We’re just going to wait and see if there’s any substance to the story,” matod ni Lonergan sa interbyu sa www.boxingscene.com kabahin sa gianunsyo ni Koncz.

Sa laing interbyu, nagkanayon si Lonergan nga sulod na sab sa unom ka mga semana siyang nakignegusasyon kang Arum.

“For the last six weeks I’ve been dealing with Bob Arum and Top Rank, since he’s the promoter of Manny Pacquiao, to put this together,” matod nji Lonergran sa interbyu sa Sydney Morning Herald.

“We now get to the point where we think we can get close to closing it so it’s going to be in Australia.”

Nidugang si Lonergan nga maghuwat na lang siya sa sunod nga mahitabo apan padayon siyang maninguha nga madala sa Australia ang away.