Unsay buhaton aron kanunay limpyo tan-awon imong awto
SA panahon karon daghan na ang nakaangkon og mga sakyanan tungod kay mas nibarato na kini ug dali na nga ma-afford sa mga tawo.
Apan kon dili mamaintenar ang kalimpyo sa sakyanan dali usab nga madaan tan-awon mao nga mas maayo nga pasinawan kanunay aron bag-o kanunay tan-awon. Adunay mga maayong pamaagi kon unsaon nga bag-o ug sinaw kanunay ang sakyanan:
1. Pili-a ang trapo nga alang gyud sa sakyanan
Usa sa mga dakong sayop usahay sa pipila lang ka tawo nga nanag-iya og mga sakyanan mao ang sayop nga pagpili og trapo sa sakyanan tungod kay kon magpataka ka og gamit og trapo, adunay posibilidad nga magaras kini. Kon masubli-subli kini, lagmit nga dali nga madaan tan-awon ang sakyanan.
2. Gamit sa dekalidad nga mga wax nga alang gyud sa sakyanan
Maayo usab nga dili magpataka og gamit og wax aron dili madaot ang sakyanan. Gikinahanglan nga adto mopalit sa baligyaanan usab og sakyanan aron dili mailad sa mga suroy nga peke.
3. Buntag usab ang maayong oras alang sa paglimpyo sa sakyanan
Kon maglimpyo sa sakyanan, maayo nga buntag buhaton aron bugnaw pa ang sakyanan ug wala pa naigo sa init sa adlaw, tungod kay kon udto o ba kaha sa hapon, mahimong init ang sakyanan ug adunay posibilidad nga madaot ilabi na ang pintura sa sakyanan.
4. Pagbutang og tire block
Butangi og tire block ang ligid sa sakyanan aron nga kanunay kini nga bag-o ug nindot nga lantawon sa mga tawo.
5. Pagbutang og air freshener
Pinaagi sa pagbutang og air freshener sa sakyanan, presko kanunay ang pamati sa mosakay.
6. Butangan usab og rag nga alang sa sakyanan sa sulod
Pinaagi sa pagbutang og rag sulod sa sakyanan, makatabang kini nga dali nga malimpyohan ang sakyanan ilabina na panahon sa ulan-ulan.