Panawagan ni Delima dili maayo
Masuk-anon si Sendora Leila Delima sa paghatag og pamahayag sa iyang press
conference kagahapon sa kaulohan batok kang Presidene Rodrigo Duterte ug nanawagan sa paghimo og nasudnong protesta batok sa presidente na iyang gitawag nga 'mamatay' sa mga kabus nga nalambigit sa gidiling druga.
Apan dili maayo ang iyang awhag sa paghimo og pag-alsa batok sa administrasyon labi na ning panahon nga panalipdan nato ang ekonomikanhong kalamboan sa nasod.
Ug kinsa usab si Delima nga moluwat sa maong pamahayag? Sa pagka tinuod, wala siyaya moral ascendancy o walay igong nawong human kuwestiyonable usab kaayo ang iyang pagkatawo. Dili na lang kita maghisgot og pagpayuhot og druga apan ang iyang pagkaimoral. Niangkon siya mismo sa pakigrelasyon sa iyang minyo nga drayber ug dunay ubang alegasyon bahin uban niang personal nga guwardiya.
Kini lang daan bug-at nang kaso labi na dili siya ordinaryong tawo human niadtong panahonan, kalihim siya sa Hustisya. Mas labaw siya nga nasayod sa balaud.
Dili niya magamit ang kahuyang sa pagkababaye human aktibo usab siya sa pakigbisog sa patas nga panglantaw sa gahom sa kababayen-an.
Hinuon, ang bag-ong pamahayag ni Delima nagsuporta sa pagbali sa pamahayag sa retired nga pulis sa dakbayan sa Davao nga si SPO3 Arthur Lascuña nga nagkanayon nga matuod ang Davao Death Squad (DDS) ug siya ang tuong kamot ni kanhi Mayor Duterte sa Davao sa pagpamatay sa mga tawong nalambigit sa drugas lakip sa iyang duha ka mga igsuon?
Grabe kini nga pagtuis sa iyang gipanumpaan nga unang pamahayag sa Senado nga nihimakak bahin sa DDS ug walay kalamboan si Duterte sa patay. Makalibog ang pagtumaw niya og balik ug tataw nga dunay dakong nagpaluyo kaniya.
Apan si Delima nihimakak nga dunay kalabotan sa pagtumaw ni Lascuña pagbalik ug niingon nga natukma lang kini sa iyang giatubang nga kaso karon, diin gilambigit sa kaso sa pagpayuhot kanhi og druga sa New Bilibid Prison ug nag-ung-ong ang laklang sa pagsikop niya aron ibahog sa bilanggoan.