Kapitan nakuhaan og armas

(Napatik sa Pebrero 9, 2017)

Nagkalainlaing matang sa armas ang nasakmit gikan sa usa ka barangay kapitan uban sa kagawad didto sa Sitio Mahayahay Barangay Tuburan, ning siyudad sa Cagayan de Oro.

Naatangan sa kapulisan sila si Efimaco Sacalon, usa ka Barangay kapitan sa Cauyunan, lungsod sa Opol, Misamis Oriental uban ang kagawad niining si Michael Talampas.

Gibutyag ni P/SInsp. Dennis Ebsolo, hepe sa Police Station 8 (PS8) sa Lumbia nga nipahigayon sila og motorcycle patrol niadtong gabhiona dihang ilang napara si Sacalon.

Nakita ang mga gibitbit niining armas hinungdan ilang gipangayoan og mga papeles apan wa gipakita.

Tungod niini gidala sila sa presinto sa kapulisan aron mas maimbestigahan.

Lakip sa nakuha sa posisyon ni Sacalon ang M79 grenade launcher nga adunay 11 ka mga eksplosibong bala, adunay 45 nga

pistol uban sa lima ka buhing bala samtang si Talampas aduna sab pistol nga nakuha.

Giangkon ni Sacalon nga way mga lisensya iyang mga gibitbit nga armas apan gipasabot niini nga proteksyon lamang kini sa iyang barangay.

“Tungod man gud kay hinterland kayo mi ug layo sa mga polis mao nga naa koy mga ingon ani pagdepensa sa among barangay..." sulti ni Sacalon.