To live with you
Nagtuo na gyud ko nga di matintal si Greg sa kaguwapa ug kaseksi ni Pamela. Misalig na gyud ko niyag husto. Apan usa ka hapon nga gikan ko sa eskuwelahan ug naglakaw ko sa sidewalk aron pag-adto sa lugar nga atngan kog sakyanan sa pagpauli, nasiplatan ko sila si Greg ug si Pamela nga nagkuyog sa paglakaw.
Nag- date silang duha? Kalit nga mikuba ang akong dughan. Mao diay nga wa ko huwata ni Greg kay miuna siyag gawas sa eskuwelahan? Duna diay silay sabot si Pamela ng magkita ug manuroy? Wa ko kapugngi ang akong kaugalingon nga magselos.
Hilom ko silang gisundan. Nanulod sila sa usa ka fast food. Diha ra ko sa gawas. Makita ko sila kay bildo man ang bungbong sa maong kan-anan. Nagpahipi lang ko aron di nila makita. Human maka- order og pagkaon ug drinks si Greg sa
counter, miadto siya sa lamesa nga nahimutangan ni Pamela nga naghuwat. Samtang nangaon sila, sa akong tan-aw ug paniid, seryuso silang nag-estoryahay. Usahay imuwestra ni Greg ang iyang bukton, mora bag dunay gipasabot kang Pamela. Unya, mokupot si Pamela sa bukton ni Greg.
Wa na ko kaagwanta sa akong nakita. Nagdali kong milakaw. Pag-abot ko sa balay, naghilak kong misulod sa akong kuwarto. Gikaguol ko gyud ang akong nasaksihan. Morag sekretong dunay relasyon sila si Greg ug Pamela. Sus, pagka buang ko diay nga misalig kang Greg. Traydor gyud diay siya.
Pagka buntag, wa koy kadasig nga miadto sa eskuwelahan. Pag-abot ko na duol sa gate, nakahunong ko paglakaw kay nakita ko si Pamela nga nagtindog. Nakakita siya nako. Nahibulong ko kay nagdala siyag dakong travelling bag. Wa koy maayong buot nga mipadayon paglakaw. Wa na ko magtan-aw kang Pamela kay gusto ko siyang likayan. Apan iya kong gisugat.
“Mahimo bang mag-estorya tag kadyot, Carmie?”
Gitutokan ko si Pamela. Seryuso kaayo siya. Karon pa ko makamatikod nga nanghubag ang iyang mga mata. Morag gikan siyang naghilak.
“Unsa may atong estoryahan?” Gibundak ko ang akong tingog kay naglagot ko kang Pamela.
“Bahin kang Greg. Kagahapon, nag-estorya mi sa Jollibee. Iya kong gipasabot nga ikaw ra ang babaye nga natingban sa iyang pagmahal. Love kaayo ka ni Greg. Di na ko mopuyo uban kang Greg, Carmie. Faithful si Greg nimo.”
Wa ko makatingog. Gisundan ko na lang sa pagtan-aw si Pamela nga mibiya nako. Wa nay pagpakaaron-ingnon ang kalipay nga gibati ko niadtong tungora. (KATAPUSAN)