MGA BARANGAY IDEKLARAR NGA DRUG-CLEARED

Duna nay mga barangay sa probinsiya sa Sugbo nga ideklarar na unya nga drug-cleared sa Kapitolyo human usab sa assessment nga gihimo sa Cebu Provincial Anti-Drug Abuse Office (CPADAO).

Apan wa hitug-an og asa kini nga mga barangay ug adto na kini ipahibawo sa Provincial Peace and Order Council (PPOC) meeting sa sunod semana.

Sa kapin 200 ka mga barangay nga una nang girekomendar sa Cebu Provincial Police Office nga ideklarar nga drug-cleared, 190 na niini ang napaubos sa assessment ug validation sa CPADAO, inabagan usab sa Philippine Drug Enforcement Agency.

Matod ni CPADAO executive director Ivy Meca nga sa mga dapit nga ila nang na-validate duna nay pipila nga nipasar sa mga lagda sa Dangerous Drugs Board, alang usab sa pagdeklarar niini nga drug cleared.

Wa pa hinuon itug-an ni Meca og unsa o asa kining mga barangay kay adto naman nila kini ideklarar sa PPOC meeting sa sunod semana.

Nahibawo na hinuon si Gob. Hilario Davide labot niini.

Sa laing bahin, gihan-ay na karon sa CPADAO ang mga paagi kon unsaon pagbahin ang ilang isuporta nga operational fund sa PDEA ug sa kapulisan nunot sa subling panagtambayayong sa duha ka ahensiya alanng sa kampaniya batok sa ilegal nga drugas.

Gustong mapalig-on sa CPADAO ang nasugdan niini nga limpyo probinsiya program kauban ang CPPO.

Sa laing bahin, gipaniguro ni Meca nga wa ray problema alang sa paghatag og insentibo sa mga law enforcement agency nga makahimo og malampuson nga anti-drug operation.