3 KA MGA LALAKE GIPAMUSIL NAMATAY

Tulo ka mga lalake ang gipamusil-patay sa managlahing dapit sa Metro Cebu.

Lapu-Lapu

Usa ka 39-anyos nga lalake ang gipusil-patay sa wa pa mailhing mamumuno sa Sitio Kabayo-an, Barangay Pajac, dakbayan sa Lapu-Lapu niadtong Sabado sa gabii.

Ang biktima mao si Ruel Amores, ulitawo, ug lumolupyo sa Sitio Sambag sa naasoy nga barangay.

Matod ni PO3 Joseph Cutanda sa Homicide Section sa Lapu-Lapu City Police Office (LLCPO) nga atol ning pagsuwat, nagpadayon pa ang ilang imbestigasyon sa kaso.

Sumala ni Cutanda, alas 8:30 sa gabii, ang biktima giingong naglingkod sa gawas sa usa ka abandonadong establisemento.

Giingong kalit nga nibutho ang wa pa mailhing mamumuno ug gipusil si Ontong sa liog gamit ang wa pa mailhing kalibre sa armas.

Paambit ni Cutanda nga nakahimo pa sa pagdagan pipila ka metros palayo sa dapit ang biktima apan nalup-og kini ug namatay.

Nasuta ning mantalaan gikan ni Cutanda nga sa wa pa ang insidente, may nakalalis si Ontong samtang nagduwa og basketball.

Kini na ang ikaduhang insidente sa pagpamusil sa dakbayan sa milabayng semana.

Niadtong Biyernes, patay dihadiha ang 42-anyos nga habalhabal drayber nga si Avelino Patigdas human kini gipusil patay sa duha ka ridingnga suspek didto sa Kadulang, Brgy. Marigondon, sa dakbayan.

Giingong ang biktima giatngan sa mga mamumuno human kini naghatod og pasahero.

Minglanilla

Gidudahang drug pusher gipusil-patay sa Sitio Relis, Barangay Poblacion Ward 2, Minglanilla niadtong Sabado sa gabii.

Ang biktima mao si Armeños de Gracia Villasencio, hamtong, naigo sa ulo ug ubang bahin sa lawas, wala na makaabot sa ospital.

Ang kapulisan nagsubay sa anggulo sa giingong kalambigitan sa biktima sa pagpalusot og druga.