Kaabunda sa Tañon Strait mibalik: Oceana

Mibalik na og kaabunda ang mga isda sa kadagatan nga sakop sa Tañon Strait Protected Seascape.

Si Atty. Gloria Estenzo-Ramos, bise presidente sa Oceana Philippines, niingon nga base sa mga testimonya sa mga mananagat nanaghan og balik ug nanagko ang mga isda nga nakuha gikan sa TSPS.

Matod niya nga mohimo sila og scientific assessment sa TSPS aron masayran ang kalamboan nga nahitabo sa TSPS labi na sa mga kinabuhi ilawom sa dagat.

Si Emma Melana, regional director sa Department of Environment and Natural Resources sa Central Visayas, namahayag tungod sa hugot nga proteksyon ug pagbantay sa mga sakop sa Coastal Law Enforcement Alliance for Region (Clear) 7 niabunda og balik ang mga isda ug niminos ang commercial fishing.

Si Josephine Flores, division chief sa Technical Service sa Bureau of Fisheries and Aquatic Resources 7, niingon nga base sa National Stock Assessment Program nga gisugdan niadtong 2017, walo ka mga klase sa isda ang abunda sa TSPS.

Kini naglakip sa budboron nga pulag ikog, tamarong, kutob, pirit, tulingan, tamban tuloy, anduhaw ug tuna.

Si Al Orolfo, director sa DENRNIR, nibutyag nga ningbalik usab ang mga sardinas sa TSPS human sa pipila ka tuig.

Ang sardinas, maoy kanunon sa dagkong mga isda ug ang presensiya niini sa dapit timaan nga limpyo ang dagat.

Ang TSPS ang labing dako nga protected areas sa Pilipinas. Tulo ka mga lalawigan ang nagpalibot sa TSPS: Cebu, Negros Occidental ug Negros Oriental; 35 ka mga lungsod ug 7 ka mga siyudad.

Sa Sugbo, gilangkoban kini sa 23 ka mga lungsod ug usa ka siyudad. Gideklarar ang TSPS nga protected seascape pinaagi sa Presidential Proclamation 1234 ni kanhi president Fidel Ramos.