PAGTUKOD SA MODERNONG POLICE STATION DILI MADAYON

Naanugnan ang hepe sa Talisay Police Station nga di madayon ang modernong building alang sa kapulisan human nausab ang hunani Mayor Eduardo Gullas labot sa pagdonar og yuta ngadto sa Philippine National Police (PNP).

Una niini ang Camp Crame nagpadalag mga tawo aron pahibaw-on nga aduna silay gigahin nga kapin sa P13 milyones alang sa pagtukod og building sa Talisay Police Station.

Apan kinahanglan nga idonar ang yuta ngadto sa PNP, ang problema tungod kay ang yuta nga gitarokan karon sa Talisay Police Station di makapasar sa gidak-on sa kinahanglan nga luna sanglit makuhaan man ang yuta sa Talisay City College.

Hinungdan nga si Gullas mipahibawo nga modonar silag kapin sa 200 metros kuwadrado nga luna sumpay sa ilang police station aron madayon nga matukoran silag police station nga gastuhan sa PNP.

Sa dihang mihatag na unta ang konseho og pagtugot ngadto ni Gullas nga modonar og yuta sa PNP, kalit lang na usab ang huna-huna sa mayor.

Sa rason nga di ra gihapon maila ang building sa PNP ug mawagtangan pa silag luna.

Si P/Supt. Emerson Dante, hepe sa Talisay Police Station, miingon nga iyang pahibaw-on ang ilang rehiyonal nga buhatan labot ning uwahing desisyon sa mayor.

Matod ni Dante nga iyang pahibaw-on nga di na madayon ang deed of donation nga gisaad sa mayor apan di usab siya makaingon nga di gusto ang mayor nga matukoran silag police station. Apan iyang nakita nga makatarunganon usab ang rason sa mayor.

Samtang gitataw niya nga di nalang siya mokwestyon niini kay hugot man usab nga misuporta si Gullas sa kapulisan.

Matod ni Dante nga angayan na unta nga adunay dako ug standard nga police station ang Talisay ilabi na kay usa na kini ka class A nga siyudad samtang ang ila karong police station alang ra sa class C nga munisipyo.

Wa siya magtuo nga di kini mahinayon sanglit na- examine naman ang foundation sa yuta ug nipasar kini makatukoran og dakong building nga aduna nay roof top apan nabasa niya sa newspaper nga di na mahinayon ang pagtukod og edipisyo human nga di na interesado si Gullas nga modonar og yuta.

Usa sa gitan-aw sa mayor nga rason mao nga ang Abotiz gikatakdang motukod og building nga libre kilid sa city hall nga maoy buhaton nga bag-ong police station.