Fire drill sa mga barangay

DUNAY iapudapod nga fire extinguisher ang Cebu City Hall sa mga kapilya diha sa kabarangayan. Mao ni gitug-an ni Nagiel Bañacia diri nako ang atong pangulo sa disaster office.

Si Fire Marshal Rogelio Bongabong nidason sab sa maong inpormasyon. Sa ato pa tanang kapilya sa dakbayan ang makapahimus og libreng fire extinguisher isip pasiunang panguntra kon dunay alarma sa sunog sa ilang dapit.

Nindot ni nga kaugmaran kay atol sa pag-apudapod niini tudloan sab ang mga molupyo unsaon paggamit. Sa ka daghan sa mga kapilya nga atong makita diha sa barangay sa ato pa mamuwak og fire extinguisher ang halos tanang sitio kay di ikalimod ang kapilya mas duol sa mga molupyo. Ilabi na sa mga sudlonon nga bahin nga di maagian og fire truck.

DRILL

Gawas sa fire extinguisher ang lain sab nga gusto nakong isugyot sa taga fire department ug sa opisina ni Nagiel mao ang pag-ila sa mga molupyo sa palibot sa kapilya nga may katakus nga mahimong masaligan pagtubag og alarma sa sunog. Mga fire volunteer nga ipailawom og training sa oras nga sila way trabaho. Niingon ko nga sa oras nga way trabaho kay daghan ko ug nailhan nga interesado nga volunteer galing lang ang mga seminar ug training maatol man sab nga tingtrabaho. Naa man gu'y daghan sa mga nagtrabaho nga di bastabasta mo- file og leave kay nakarga sila sa mga mamumuo nga no work no pay. Mao ni sila ang nagdawat og suhol nga inadlaw. Mahimong sugdan ang paghashas pinaagi sa mga opisyal sa kapilya. Manglista og volunteers dayon iduso ngadto sa over all coordinator sa programa sa barangay.

Ang over all coordinator mahimong maggikan sa buhatan ni Bongabong ug maoy sangunan pag- schedule sa seminar ug training. Kon makumpleto na kini ang actual drill himuon mismo sa ilang dapit. Sa actual nga drill makita ug maila ang posibling kakuwangan pag kumbati sa kayo.

Atubangan sa mga molupyo ang drill makapahigmata kanila sa kamatuoran nga kon way suporta gikan sa mga residente mas dako nga perdisyon ang sagubangon.