Timailhan sa panahon
Ang ulahing sunodsunod nga linog sa Surigao dakong timailhan sa nag-ung-ong nga kusog nga pagtay-og sa yuta, ang gitawag sa mga batid sa pagtuon sa lihok sa yuta nga ' the big one.' Kon kanus-a, walay tukma nga nasayod bisan ang mga batid sa siyensiya kon kanus-a mahitabo.
Wala pa hingpit ang pagpahiuli sa dakbayan ug mga lalawigan sa Surigao sa magnitude 6.7 nga linog sa miaging buwan, laing kusog nga aftershock nga nitala og magnitude 5.9 ang nitay-og na usab sa maong dapit kagahapon sa buntag.
Usa ka tiguwang ang giataki-patay ug laing 20 ka mga tawo ang angol human sa kusog nga aftershock. Sa linog sa miaging buwan sa samang dapit, pito ang patay ug gatosan ang angol samtang binilyon nga inprastraktura ug kabtangan ang nangadaut.
Sumala sa Philippine Institute of Volcanology and Seismology (Phivolcs), ang linog kagahapon sa buntag gikan sa 13 kilometros sa habagatang-kasadpan sa Surigao City sa Surigao del Norte sa alas 8:08 sa buntag ug tectonic ang origin ug ang gilawmon naa sa 13 kilometros.
Si Phivolcs Director Renato Solidum nikompirmar nga ang ulahing linog sa Surigao usa ka aftershock sa linog sa miaging buwan.
Usa lang ang ipasabot niini? Nagsige pa og lihok ang yuta sa ilawom? Dili ba ang dakong fault sa nasod subay sa mapa sa Phivolcs nagsubay sa silangan sa nasod gikan sa Luzon, Kabisay-an ug nitapos dapit sa Surigao sa Mindanao? Dili ba kini timailhan sa ' the big one' nga naghulga sa puno sa populasyon sa Metro Manila.
Apan wala kitay mahimo ug igong gahom sa lihok sa puwersa kinaiyahan. Hinuon, ang pagpangandam dako og mahimo sa paghinos sa epekto sa kinabuhi ug kabtangan busa gihimo seryuso ang pagpahigayon sa earthquake drills ug daling pagtubag sa emerhensiya lakip sa komunikasyon.