You mean everything to me
Gitan-aw ko pag-ayo ni Marlou dihang nagtindog na siya sa akong atubangan. Seryuso kaayo siya. Nahikatawa ko.
“Ngano gud tawon nga ingon man ana ang imong tinan-awan nako, Marlou?”
Karon pa ko makamatikod niya nga gitutokan ko niyag dugay.
“Nahubog ka kagabii. Pila na ka kagabii nga ingon ka ani. Si Marlon ba ang rason?”
Miginhawa kog lawom. Unya mitando ko.
“Nag-uli sila si Marlene. Nasultihan ta man ka nako about Marlene, no?”
“Oo. Siya ang imong giingon nako nga maoy first love ni Marlon. Nagbuwag na man sila, di ba? Ug si Marlene ang nakigbuwag mismo kang Marlon? Sus, kon ako pa, di ko makig-uli sa girl nga nakigbuwag na nako, uy.”
Nakapangawot ko sa akong ulo.
“Lain-lain man ang lalake, Marlou.”
“Aw, nuon, husto ka sab ana. Unya, ikaw, unsa na man lang sa kinabuhi ni Marlon?”
“Aw, unsa pa? Uyab gihapon mi. Di na man tingali importante karong panahona nga ang girl gusto nga siya lang gyud ang girlfriend sa usa ka laki?”
“Imo nang desisyon, Katrina. Pero amping lang gyud. Morag nagkoleksyon og uyab na si Marlon.” “Concern ka nako, Marlou?” “Siyempre. Kanamo gud ni Mama ka gibilin sa imong parents? Tulubagon ka namo ni Mama kon dunay di maayong mahitabo nimo, especially about your lovelife.” “Thanko you, Marlou.” Unya migawas na si Marlou sa akong kuwarto. Naligo ko sa banyo sa akong kuwarto. Tibuok adlaw kong wa mogawas sa among balay. Medyo karaan na kining among balay. Gipundar kini nilang Mama ug Papa apan ilang gibiyaan kay tua sila manarbaho sa laing mga nasod. Aside from that, nagbuwag na sab sila. Si Nang Talya nga inahan ni Marlou dugay nang nahimo namong katabang. Dinhi na sab sa balay magdako si Marlou.
Pagka gabii, nakita ko si Marlou nga naghinuktok sa among lawn. Nagtabyug-tabyog siya sa gilingloran nga swing. Giduol ko siya. Igo lang siyang mipasiplat nako.
“Lawom man ang imong gihunahuna, Malou? Ang imong Papa ba ang hinungdan ning imong kaguol ron?”
“Di ko lang kalikayan nga mahunahuna siya, Katrina.”
“May balita ka na ba niya karon?”
“Oo, Minyo na siya sa laing babaye.”
Wa ko kalikayi nga mobatig kaluoy kang Marlou.