CAVALIERS GILUBONG
Gipahimuslan sa host Miami Heat ang pagpahuway nila ni LeBron James ug Kyrie Irving ug ilang gipanglampornas ang defending champions Cleveland Cavaliers, 120-92, kagahapon sa National Basketball Association (NBA).
Nakadesisyon ang Cavaliers nga papahuwayon ang ilang duha ka mga sinaligan ug gikan sa pagsugod sa duwa hangtod sa katapusan, wala’y giusik nga kahigayunan ang Heat.
Gipangulohan ni Goran Dragic ang kadaugan pinaagi sa iyang 23 puntos, nidugang og 20 puntos si Hassan Whiteside ug 13 rebounds, nitampo og 17 puntos si Tyler Johnson samtang nihatag og 12 puntos si Wayne Ellington.
Ang Heat nagkainit ug naposte nila ang ilang ika-18 nga daog sa katapusan nilang 22 ka mga duwa. Mingsaka na ang Heat sa 29-34 nga rekord.
Linubnganay man tuod ang duwa apan miulbo gihapon ang emosyon sa hinapos nga bahin dihang gihapak ni Heat rookie Rodney McGruder ang bukobuko ni Channing Frye human sa iyang paghansak.
Nakainit kini sa kampo sa Cavaliers hilabi na kang J.R. Smith, kinsa wala mag-uniporme gumikan kay aduna kini angol. Diriyot miulbo ang kasamok.
“Ado about nothing,” matod ni Heat coach Erik Spoelstra.
Alang kang Frye, dili ra angayan hatagan og gibug-aton ang maong hitabo.
“It’s not really a story. Tempers flared. It is what it is. It’s over now. They won. Congrats,” matod ni Frye.
Ang Cavaliers, nga natagak sa 42-19 nga rekord, nakaangkon sa ilang ikalimang sunodsunod nga kapildihan batok sa Heat gikan sa pagbiya ni James sa Miami aron mobalik sa Cleveland.
Gipangulohan ni Frye ang Cavaliers pinaagi sa iyang 21 puntos, nidugang og 15 puntos si Kyle Korver samtang nihatag og 11 puntos si Richard Jefferson.
Ang Cavaliers ningduwa sab nga wala sila si Kevin Love, kinsa adunay angol, ug Andrew Bogut, kinsa aduna pa’y personal nga giatiman.
Gawas nga kuwangan sila og mga magduduwa, ang Cavaliers nagkalisod sab sa depensa sa Heat hinungdan sa ilang pagkalubong.
Gibutyag ni Cavaliers coach Tyronn Lue nga dili kini maoy katapusang higayon nga iyang papahuwayon si James sa dili pa mahuman ang regular season.
Gipasabot ni Lue nga kinahanglan pa niyang hatagan og taastaas nga pahuway si James aron maandam kini sa nagkaduol nga playoffs.
Sa laing duwa, mipabaha og 34 puntos si Kawhi Leonard, milangkat og 10 ka rebounds ug ang San Antonio Spurs mitangtang sa tango sa Minnesota Timberwolves pinaagi sa overtime, 97-90.
Ang kadaugan naghatag sa Spurs og otomatikong lingkuranan sa playoffs nga maoy ika-20 ka sunodsunod nga higayon.
Midugang og 18 si LaMarcus Aldridge nga may 10 ka rebounds.
Gibalian sa Los Angeles Clippers og sungay ang Chicago Bulls, 101-91, ubos sa pagpangulo ni Jamal Crawford nga may 25 puntos.
Misulbong usab ang Houston Rockets, 123-108 batok sa Memphis Grizzlies. Si James Harden mipabaha og 33 puntos,.
Gipakaging sa Milwaukee Bucks ang Toronto Raptors, 10194; gilupig sa Charlotte Hornets ang Denver Nuggets, 112-102.
Gilubong og taga tuhod sa Detroit Pistons ang Philadelphia Sixers, 136-106.