MGA CLINIC PERSONNEL SA CPDRC GIPULIHAN
Giilisan ang tanang personnel sa clinic sa Cebu Provincial Detention and Rehabilitation Center (CPDRC) human masuta nga usa sa mga nurse nipatukod og espesyal nga selda alang sa iyang igsuon nga napriso usab sa provincial jail.
Nadiskubrehan ang maong espesyal nga selda atol sa Greyhound Operation sa Philippine Drug Enforcement Agency (PDEA) sa miaging semana human nga nakababag sa agianan sa mga operatiba kay diha gitukod sa hallway gawas sa infirmary sa prisohan.
Samtang naghuot ang kapin sa 2,700 ka mga piniriso sa CPDRC sa regular nga mga selda, usa ka piniriso nga nag-atubang og kasong may kalambigitan sa ilegal nga drugas ang hayahay og kahimtang human gipatukuran sa iyang igsuong nurse og espesyal nga selda sulod sa prisohan.
Nagtrabaho sa clinic sa provincial jail ang nurse hinungdan nga sayon ang iyang pagpatukod sa espesyal nga selda.
Duna kini hospital bed nga maoy higdaan sa iyang igsuon, electric fan ug radyo.
Matod ni CPDRC officer-incharge, Bobby Legaspi, nadiskubrehan kini atol sa greyhound operation sa PDEA sa miaging semana kay wa dayon makaagi sa hallway ang mga operatiba tungod sa nagbabag nga selda.
Tungod niini, ang nurse nga responsable girekomendar na nga ipaubos sa imbestigasyon sa Committee on Discipline and Investigation sa Kapitolyo.
Samtang gihimo kini, gipabalik na siya ug ang laing tulo niya ka mga kaubang nurse sa ilang mother unit, nga mao ang Provincial Health Office.
Nagtuo si Legaspi nga dunay pagtugot ni kanhi acting warden Dr. Gil Macato ug sa uban pang jail personnel ang pagpatukod sa espesyal nga selda. /