KABTANGAN NI FRANZ GI-FREEZE

Gipugngan sa korte ang mga kabtangan ug minilyon nga kwarta sa tulo ka mga bank account ni Franz Sabalones, gitumbok nga drug lord sa habagatang Sugbo human nasuta nga gikan sa illegal drugs ang gipalit niini.

Ang mga kabtangan nga gipa-hold sa korte mao ang unom ka mga parsela sa yuta, kadaghanan naa sa lungsod sa San Fernando.

Tulo usab niya ka bank accounts sa duha ka mga bangko gipa-freeze usab sa Court of Appeals (CA) subay sa reklamo sa Philippine Drug Enforcement Agency (PDEA) ug Anti-Money Laundering Council (AMLC).

Ang mga kabtangan naglakip sa usa ka beach resort, poultry farm, unom ka mga sakyanan ug mga deposito sa banko nga balor og P76 milyunes.

Gisusi pa sa PDEA 7 ang ubang mga dokumento alang sa dugang pang pag-freeze sa mga kabtangan ni Sabalones.

Matod ni PDEA 7 Director Yogi Filemon Ruiz, ning maong kamandoan, di na makahilabot si Sabalones sa iyang mga kabtangan samtang gidungog pa kini sa korte.

“Naay Cebu City, naay Cebu Province but nag focus ta karon sa mga properties nga naa diri sa Cebu Province. Mafreeze ni siya. Dili na ni pwede mabaligya, dili na pwede i-transfer og laing pa-ngalan. Kon madesisyonan na with finality, i-sequester siya sa gobiyerno,” matod ni Ruiz.

Unom ka buwan nga gipaubos sa imbestigasyon si Sabalones ug pagkuha sa mga ebedensya sa PDEA-7 uban sa AMLC si Sabalones.

Sa dihang ilang nasuta nga duna kini dagkong kabtangan ug nakakuha sila og mga dokumento, ila dayon nga giduso sa korte niadtong Enero ning tuiga ang petisyon sa pag-freeze sa asset ni Sabalones.

Kon makahukom ang korte sa pag imbargo sa maong mga kabtangan pabor sa gobiyerno, tinguha ni Ruiz nga tukuran kini og drug rehabilitation center tungod sa kalapad sa mga luna ni Sabalones.

Dunay mga kabtangan nga nakapangalan sa laing tawo apan ila gihapon nga nakuha ang impormasyon nga si Sabalones ra gihapon ang tag-iya niini.

Si Franz giingong naa pa kini sa Campo Crame human nitahan.

Samtang si Chief Supt. Noli Taliño niingon nga dunay dakong epekto sa illegal nga negosyo ni Sabalones ang pagpugong sa iyang mga katigayonan

Matod ni Taliño nga wa nay magamit si sabalones sa pagpamalit sa illegal nga drugas ilabi na sa iyang mga gaway nga una nang gikataho nga mibalik sa illegal drug trade.

“Malaking dagok ito sa kanyang illegal drug trade kasi wala na syang magamit na pera,” matod ni Taliño.

■ KABTANGAN. Usa kini sa mga pasilidad sa Paulo Luna Resort and Spa sa lungsod sa San Fernando nga iya ni Franz Sabalones. Gipa-freeze kini sa Court of Appeals. /file photo