Magtiayon gipusil, patay; suspek silingan, mitahan
Managtiayon gipusil patay sa ila ra usab nga silingan sa Zone 5 Central Biasong, dakbayan sa Talisay niadtong Lunes.
Ang kapulisan wala mosalikway sa posibilidad nga bawos kini niadtong giingong lalake nga gipatay sa amahan ug mga anak ingon man kabanay niadtong Dominggo sa gabii sa samang dapit.
Kini human nila masuta nga ang bana igsuon sa usa sa mga giakusahang ningpatay kang Reynaldo Olaquiber niadtong Dominggo.
Ang gipatay giilang sila si Carmilo, 52 ug ang iyang asawa nga si Olivia Villaver.
Si Carmilo igsuon ni Reynaldo Villaver, usa sa upat ka mga suspek sa pagpatay kang Olaquiber.
Ang suspek sa pagpatay sa magtiayon giilang si Gegie Barliso, 31, higala ug silingan ni Olaquiber.
Si Barliso nitahan kang Kapitan Reynaldo Bas ug nitugyan kaniya sa kapulisan.
Samdan si Carmilo sa iyang liog, walang tiil, tuo nga kamot ug walang abaga samtang naigo sa ulo ang iyang asawa.
Ang managtiayon daling gidala sa tambalanan apan gideklarar nga patay si Carmilo samtang pipila ka oras ang nilabay, namatay usab si Olivia.
Si SPO2 Yvonne Ilustrisimo sa Talisay City Police Station niingon nga ila karong gitanang anggulo nga may kalabotan kini sa pagkamatay ni Olaquiber.
Samtang ang asawa ni Olaquiber nga si Anabel nga miadto sa police station kagahapon mihimakak sa pasangil sa mga Villaver nga nanulong ang iyang bana.
Matod niya nga naglakaw ang iyang bana layo sa balay sa mga Villaver dihang gitangan sa mga Villaver ug gitabangan pagbunal.
Si Carmilo giingong usa sa mga ningbunal kang Olaquiber.
Ang mga Villaver ug si Olaquiber giingong duna nay daang panagsungi hinungdan sa ilang pag-initay.