BUSINESS PERMIT ALANG SA TRAYSIKOL WAGTANGON NA?
Dako ang pag-uyon ni Mandaue City Legal Officer Omar Redulla ug Konsehal Elstone Dabon, pangulo sa komitiba sa tansportasyon sa konseho, nga wagtangon na unya ang paglukat sa business permit sa mga traysikol nga nagdagan sa dakbayan nga giapil niadto sa pagkuha ug prankisa.
Sa dihang nahinabi sa mga tigbalita kagahapon, si Redulla nagkanayon nga dugang hasol na alang sa mga traysikol drayber kon ila pa kining palukaton og business permit gawas sa prankisa sa city hall.
“It’s an additional burden to the marginal sector of our society nga nanginabuhi tawn na og traysikol tawon niya murag nadoble. It’s not technically double taxation but more or less double imposition. Maluoy na ta nila,” ni Redulla sa dihang nahinabi sa Superbalita Cebu kagahapon.
Iyang girekomendar nga prankisa lang ang lukaton sa mga traysikol drayber aron di na unya kini mahasol sa daghan pang mga bayranan.
Matod niya, ipawagtang na unya nila ang business permit sa mga traysikol pinaagi sa pagduso ug usa ka ordinansa.
Niuyon si Mayor Luigi Quisumbing sa sugyot human nga nipadayag kaniya ang mga traysikol sa dakbayan kalabot niini nga daw “nadoble” na ang ilang mga nalukat nga permiso sa city hall aron nga makapamasahero lang.
Uyon usab si Konsehal Dabon sa pagwagtang niini sanglit wa man kini kaniadto.
Apan bisan pa man sa positibong lakang sa city hall kalabot sa hangyo sa mga drayber sa dakbayan, pabiling ubos ang nilukat og prankisa sa city hall.
“Ang nakalukat ron sa franchise more than 200 pa,” ni Dabon.
Si Dabon nagkanayon nga 2,000 ka mga prankisa ang gi-alokar sa city hall niadto apan gipun-an kini ug dugang 1,000 aron lang nga maagni ang ubang drayber nga molukat ug prankisa.
Nanghinaot si Dabon nga pinaagi sa pagwagtang sa BP, maagni ang mga drayber nga molukat ug prankisa sa city hall sanglit di man bug-at ang P1,000 nga bayranan niini.
Si Glenn Antigua, pangulo sa Trafc Enforcement Agency of Mandaue (TEAM), nipadayag nga mopahigayon og crackdown ang iyang buhatan batok sa mga kolorum nga traysikol human nila ug meeting sa mga drayber ug operator sa dakbayan. /