Comelec: special registration para sa mga babaye karong adlawa

Mopahigayon ug special registration ang Commission on Elections (Comelec) karong adlawa, alang sa kababayen-an, nunot usab sa kasaulogan sa Women’s Month karong buwana.

Gitug-an ni Cebu Provincial Election supervisor Lionel Marco Castillano nga gimanduan sila sa ilang ulohang buhatan pagpahigayon isip subay usab sa kasaulogan sa Women’s Month sa buwan sa Marso.

Kini agi usab ug pag-ila sa papel ug mga katungod sa kababayen-an sa katilingban, base usab sa Magna Carta for Women.

Dinhi sa Sugbo, ang mga siyudad sa Mandaue, Lapulapu ug Cebu City mao lang ang gi-require nga mopahigayon ug special registration for women and girls.

Sa dakbayan sa Sugbo himuon kini sa Robinsons Cybergate samtang sa Mandaue Sports Complex usab kini pagpahimuon alang sa mga taga dakbayan sa Mandaue ug sa Gaisano Grand Mall usab sa Lapulapu City.

Ang venue sa kalihukan gisiguro nga duol sa mga tambalanan tungod kay daghan ang kababayen-an nga nag-serbisyo sa health sector ug sila usab kadtong mga dili dayon maka-adto sa Comelec ofces aron pagpa-rehistro tungod sa skedyul sa ilang trabaho.

Bisan ug ang tulo lang ka mga highly-urbanized city dinhi sa Sugbo ang gi-require sa pagpahigayon sa special registration apan wala hinuon did-i ang ubang mga local Comelec ofce sa kalungsuran sa paghimo usab niini.

Giklaro sab ni Castillano nga mahimo gihapon nga dawaton kadtong mga lalaki nga magpa-rehistro apan prayoridad o unahon gyud kadtong mga babaye, ilabi na kadtong mga mabdos, mga edaran ug kadtong dunay kakulian sa panlawas.

Sa Abril 29 ang deadline sa nagpadayon nga rehistrasyon sa Comelec alang sa barangay ug Sangguniang Kabataan (SK) elections, nga gitakda sa buwan sa Oktubre karong tuiga. /