Ang kataw-anan nga desisyon sa Ombudsman

Kataw-anan ang desisyon sa Office of the Ombudsman sa kaso batok sa mga kanhi miyembro sa Sangguniang Panlalawigan sa Bohol. Walo sila nga mipirma sa resolusyon nga naghatag og katungod sa Gobernador nga mopirma og kontrata aron mopalit og duha ka heavy equipment. Apan sa dihang gipakanaog ang resolusyon, ang uban gimandoan nga suspensuhon og siyam ka buwan nga way suweldo samtang ang uban gi-dismiss ang ilang kaso. Pagkalisod sabton.

Parehas ra sila og resolusyon nga gipirmahan. Parehas usab sila og tubag kay usa ra man ang ilang counter-affidavit nga gi-file sa dihang gimandoan sila nga patubagon. Parehas usab sila og abogado kay gilabanan man sila sa Provincial Legal Office. Apan naunsang pagka-unsaa nga lahi-lahi man ang desisyon sa walo ka mga kanhi sakop sa Sangguniang Panlalawigan sa Bohol kay ang uban gisuspenso samtang ang uban gi-dismiss ang ilang kaso?

Gusto na ni Negros Oriental Governor Ruel Degamo nga iuli na ang iyang probinsiya gikan sa Negros Island Region (NIR) padung sa Rehiyon 7. Sa iyang way petsa nga suwat kang Presidente Rodrigo Duterte, misulti si Gob. Degamo ang kalisod sa sitwasyon sa NIR sanglit wa may budget nga gigahin sa kagamhanan alang sa operasyon niini. Matod pa niya, ang budget sa Negros Oriental anaa sa Rehiyon 7 samtang ang budget sa Negros Occidental anaa sa Rehiyon 6. Tungod niini, matod pa niya, naghatag lang kini og komplikasyon sa pagproseso sa mga proyekto sanglit daghan pa man og agian ang mga dokumento sa duha ka probinsiya.

Misibo kini sa pamahayag ni Cabinet Secretary Jun Evasco. Matod pa ni Evasco, sa level sa kabinete ni Pres. Duterte, hugot nga giawhag ni Budget Secretary Ben Diokno ang pag-undang sa operasyon sa NIR sanglit magkinahanglan man kini og dugang nga P19 bilyon sa budget sa nasod alang sa operasyon niini. Imbes mogahin ang nasod og P19 bilyones nga dugang pundo alang sa NIR, maayo pa kuno og gamiton ang kantidad alang sa pagpalambo sa ekonomiya sa nasod, dugang pa ni Evasco.

Adunay eksperto sa Philippine Constitution ang naghuna-huna nga angay na seguro nga papason na ang posisyon sa usa ka Gobernador ug uban pa nga mga posisyon sa probinsiya. Mora og kataw-anan ang sugyot? Apan midugang siya pagpasabot nga nakita niya nga miabot na ang panahon nga makamao na ang mga mayor sa pagdumala sa ilang tagsa-tagsa ka mga lungsod. Unsa pa may gamit sa gobernador kon anaa na ang mga mayor nga modumala sa lungsod, pangutana sa eksperto sa balaod. Gawas pa niini, dugang pa niya, daghang opisyal, daghang kurapsiyon ug maghatag lang kini og dugang gibug-aton sa gipas-an nga kalisod sa katawhan.