Ug misayaw ang krusipiho

Karon, ikasugilon na. Sa sinugdanan pagpahiling lang unta sa akong infected nga little toe sa tuong tiil tungod sa kabalisa sa akong pagka diabetic. Didto ko sa emergency unit sa ospital.

Gitagad dayon ko sa mga nars ug doktor. Nakahukom ang akong asawa ug mga anak nga magpa- admit na lang ko aron mapahimuslan ang akong insurance nga gikuha sa akong bata para nako.

Paglabay sa duha ka adlaw. Gibati nako nga nagkagrabe ang paminaw sa akong lawas. Hangtod, unexpectedly, giatake kog pneumonia inubanag cardiac arrest, matod sa akong doktor.

Ug suwerte nga diha ko daan sa ospital, gidali dayon ko sa ICU (Intensive Care Unit) ug sud sa lima ka adlaw gibuhi lang sa vibrator ug tubo alang sa pagkaon.

Ang nakabentaha kay wa ko kuhaig huwisyo. Kay nahulian man dayon ko pipila ka mga minutos gikan sa pag-atake. Maka-estorya pa ko sa suod kong mga higala nga miduaw kanako. Diha sad ang akong mga igsuon ug mga kaliwat.

Anha nimo masukod ang gibug-aton sa imong mga higala sa panahon nga ingon niini. Miduaw si Dr. Mel Allego ug kapikas nga si Bebe direct from the States kay atol man sa ilang medical mission sa Pilipinas.

Si Mel akong suod nga literary buddy since college days sa Southwestern University (SWU). Siya ang founder sa Bathalad, pundok sa mga magsusulat sa atong dila dinhi sa Sugbo.

Miduaw sad nako direct from the States atol sa iyang pagbakasyon dinhi si Engr. Delfin “Boy” Alesna. Suod nako nga co-worker sa NFA (National Food Authority) for almost 30 years.

Si Boy usa ka board topnotcher sa Civil Engineering (3rd placer) sa 1960’s. Nahimong provincial manager sa NFA, Bohol sa wa pa moadto sa Amerika.

Motuo mo nako ug sa di. Sa akong kahimtang nga matawag nga fighting for survival. Sa katapusang higayon nangaliya ko sa Ginuo atubangan sa usa krusipiho sa akong atbang. “Ginuo ko lugwayi pa ang akong kinabuhi!” Mihilak ko! Takulahaw may badlis nga puwa nga miarko ibabaw sa iyang ulo.

Dayon inanay nga miudhak ang krusipiho. Unya, milihok ang lawas ug daw misayaw. “Nars, ang krusipiho misayaw, tan-awa, akong gitudlo. Wa man, Sir! Maoy tubag sa Nars. Nagpasabot ang tanan nga gidawat ang akong pangaliya.