Oplan Double Barrel

Panahon sa administrasyon ni kanhi Presidente Gloria Arroyo, ang problema sa gidiling drugas giisa na ngadto sa usa mga hulga sa nasudnong seguridad. Ang mosunod nga administrasyon ning-uyon sa naasoy nga hulga sa nasod ug sila dunay managlahing lakang sa pagtubag sa problema hangtod sa kasamtangang administrayon ni Rodrigo Duterte nga grabe ang iyang pasyon sa pagsumpo sa druga, hinungdan nga kontrobersiyal kaayo.

Apan di nato ikalimod nga si Duterte lang maoy nakaugkat sa atubangan sa publiko kon unsa na kalawom ug kalapad ang operasyon sa illegal drugs. Hinuon, isip nasod ug nagsunod sa lagda ug proseso sa balaud, ang tigbantay sa tawhanong katu-ngod, moralidad sama sa simbahan ug lakip sa kontra sa pulitika, nakakita og buslot sa tiunay nga tuyo sa presidente sa pagpatunhay sa nasod nga gawasnon sa druga, diin nakaapekto pag-ayo sa mga batan-on.

Samtang, matag partido sa isyu dunay iyang punto gawas lang sa mga politiko nga nanakay usab sa isyu ug gigamit niini batok sa presidente, kinsa dunay kahuyangan sa iyang pasyon sa pakigbatok sa druga, busa gihunong ang Oplan Tokhang nga gipangunahan sa Philippine National Police (PNP) human nagamit sa mga dautang elemento nga aktibo pa sa serbisyo ug gibalik sa pagtutok sa laing kontrobersiyal nga Philippine Drug Enforcement Agency (PDEA).

Namatikdan nga dili masakop sa PDEA ang kampanya, si Duterte nisangon pagbalik sa PNP apan ubos sa mas halapad nga konsepto ug bag-ong ngan nga Oplan Double Barrel Alpha.

Maglakip na kini dili lang sa mga lokal nga opisyal, lakip na sa simbahan ug nagpakabang grupo sa tawhanong katungod, tunghaan, pabrika ug uban pa aron paggiya sa kapulisan. Dili lang kini problema sa PNP, natong tanan. Busa, suwayan nato ang edukasyon-operasyon-rehabilitasyon nga solusyon.