NBI ug Kapitolyo

Para nako dako kaayo og papel ang Provincial Women's Commission (PWC) sa pagpanguna ni Bise Gobernador Agnes Magpale nga maoy nangulo aron proteksyunan ang mga kababayen-an batok sa bisan unsang matang sa pagpangabuso.

Sama sa paglihok sa National Bureau of Investigation ( NBI 7) sa koordinasyon sa PWC aron sa pagluwas sa mga babaye nga nalambigit sa prostitution nga gihimong escort sa mga Koreanong turista.

Daghan nang kalampusang nahimo ang PWC nga usa sa dakong programa sa Kapitolyo kauban ni Gobernador Junjun Davide, sama sa pag-luwas sa mga minor de edad nga nahimong biktima sa mga langyaw pinaagi sa cyber sex.

Way ayong mga senador

Di maayo ug makapaduda nga dunay pagsabotahi ang gipakita sa mga senador sama kanila ni Senador Panfilo Lacson, Manny Pacquiao, Peter Cayetano, Tito Soto, JV Ejercito ug mga kauban sa mga pangutana niini ngadto ni SP03 Arthur Lascañas.

May labot sa seryusong alegasyon ni Lascañas batok ni Presidente Rodrigo Duterte nga maoy gitumbok nga responsabli sa mga patay nga gihimo sa Davao Death Squad (DDS ) sa dihang mayor pa kini.

Imbes suportaan ang tawo nga nakaila sa suspek aron pangitaon ang mga ebidensya daw gidepensahan naman hinuon sa mga senador si Duterte ug giinsulto si Lascañas.

Ang papel sa senado mao ang pagtan-aw ug kon unsay balaod ang mapasar may labot sa isyu nga naglambigit sa presidente sa halapad nga patay.

Ug di ang paghunong sa Senate hearing sa EJK sa kometiba ni Lacson ang sulbad kon di ang pag- ilis sa mga senador nga wanay kridibilidad.

Ang pagbarog sa tunga ang gipaabot sa mga tawo ug di ang personal nga interes sa mga senador tungod lang sa ilang pamulitika.

Kon imong tan-awon hadlok man si Lacson nga sumbalikon sa kampo ni Duterte. Ang senador nakontrobersya human nalambigit sa kaso sa patay sa kanhi administrasyon ni Presidente Joseph Estrada.

Tiaw moy dili na ipadayon sa komitiba ni Lacson ang hearing sa isyu sa EJK ug isangon nalang ngadto sa kapulisan ug Commission on Human Rights (CHR) ang pasangil ni Lascaña batok sa presidente.

Ang maayo tingali nga buhaton i-secure ang mass grave nga isipon nga crime scene nga gitudlo ni Lascañas diin didto gilubong ang mga biktima sa DDS.

Apil na ang pag pahingan ni Lascañas sa pangan sa iyang gipamatay. Dungan sa pag pangita sa pangan sa mga nahimong biktima ingon man ang pagpatawag sa mga kabanay niini ngadto sa senado.

Detalyado man gud ang gitabi ni Lascañas. Kini nag corroborate sa unang testigos nga si Edgar Matobato nga maoy unang mipasangil ni Duterte sa DDS.