You mean everything to me
Gituman ni Marlon ang iyang giingon nako. Every Monday, Wednesday ug Friday, bisitahan ko niya inig kagabii.
“Kumusta na mo si Marlene, Mar?”
Nagtupad mig lingkod si Marlon sa taas nga sopa. Gikuptan ko ang iyang usa ka kamot. Mora siyag nahingangha Wa tingali siya mag-expect nga makapangutana ko sa ingon kay si Marlene karibal ko man sa iyang gugma. “Well, sa pagka karon very
smooth ang among relationship. Pero di ta maghisgot niya, uy, Katrina. Nia ko ron para nimo.”
“Tuod, no? Eskedyol ko man diay ron nimo.”
Nag-aper mi si Marlon ug unya nagkinataw-anay mi. Misandig ko sa dughan sa akong boyfriend. Iyang gihapuhap ang akong ulo ug gihagkan ko niya sa aping. Gihangad ko siya. Nagkahinagkanay mi sa lips. But light lang ug kadali ra.
“Kumosta na diay ang imong Mama ug Papa, Kat?”
Mitarong kog lingkod. Nakapanghupaw ko.
“Well, as usual, buwag gihapon sila. You know, Mar, wa na ko maglaom nga matibuok pag-usab ang among pamilya. Basig duna na silay laing tagsa-tagsa ka pamilya ron sa nahimutangan nilang lugar. But I’m not interested to know kon tinuod ba ang akong pagtuo.”
Gigakos ko ni Marlon. Migakos sab ko niya.
“Di ta maghisgot sa akong parents, Mar. Maoy atong hisgotan ang bahin nato.”
“You know, Kat, nakahibawo ko nga di hangtod sa hangtod nga ingon ani ang atong sitwasyong tulo ni Marlene. Moabot ang time nga usa na lang gyud ang akong pilion ninyong duha.”
Nakapanghupaw ko. Bisag wa ko sultihi karon ni Marlon sa iyang hunahuna, nagtuo na ko nga someday, usa na lang namo ni Marlene ang iyang higugmaon. Nakahibawo ko nga di dumalayon ang among sitwasyong tulo ni Marlene. “Naa ra man na nimo, Mar.” “Bitaw.” Dihang mipauli na si Marlon, duna koy namatikdan niya. Morag wa kaayo siya magmalipayon sa iyang pagpamisita nako karon. Ah, gikapoyan lang tingali siya. Hilom kong nakaingon sa akong kaugalingon.
Miadto ko sa terrace kay di pa man lawom ang gabii. Nakatan-aw ko kang Marlou nga naghinuktok sa among lawn. Magul-anon na sab siya. Nabatyagan ko na sab sa akong kaugalingon ang gibati kong kaluoy niya.