Hadlok ma-inlove

Dear Papa Joe,

Tagoa lang ko sa ngalang Fred. 21, taga Mindanao. Usa ko sa inyong loyal reader sa inyong online newspaper. Ako lang i-share akong personal nga kinabuhi.

Fourth year high school ra ko taman kay di baya ko sociable nga pagkatawo. Duna koy gamay nga negusyo. Usa ko ka cellphone technician. Maayo kog kita kay daghan ko og kustomer. Usahay magsagunson.

Kanunay ko nisuporta sa akong manghod sa ilang pag-eskuyla. Dili baya ko hilig maglaag gawas lang kon naay kalihukan sa siyudad ug sa eskuylahan sama sa reunion ug alumni. Hangtod karon dili kaayo ko hilig mag uyab-uyab kay dali ra ko masakitan. Gusto ko magpabiling single sa tibuok kinabuhi, Pero mosugot gyud ko mag-adopt og bata.

Sa imong tan-aw, maayo ba kaha ni? Please tambagi ko. FRED Fred,

Mao nay giingon nga kon asa ka malipayon, buhata. Pero ayaw kahadlok masakitan kay tawo ta. Normal ra na. Posible nga na-trauma ka sa imong kanhi kinabuhi, labi na nakakita ka sa kalisud sa inyong pagpuyo. Ikaw pa gani karon ang nag-support sa imong igsuon.

Lain sab mao nga posible nga wa kay self confidence, labi na taas tingali ang imong standard sa mahimo nimong pares mao nga okay na lang nimo nga ma-single kay sa masakitan.

Kanang mangadap ka og bata maayo na. At least makatabang ka sa ubang tawo. Apan angay kang magbantay kay basin mo babag ang imong pamilya kay nganong sa lain pa man ka mangita og bata nga na naa man sila nga pwede nimo tabangan. Lastly, pag-ampo sa Ginuo aron ka malamdagan ug giyahan sa imong mga desisyon sa kinabuhi. Kana lang ug daghang salamat. PAPA JOE (sa inyong tampo ipadala sa papajoesuperb@gmail.com)