Beermen ug Lakers
So, nasukwahi ang mga pangagpas sa kadaghanan nga moabot og Game 7 ang PBA Philippine Cup finals series tali sa San Miguel Beer ug Barangay Ginebra human gitapos sa Beermen ang serya sa Game 5 aron langkaton ang ilang ikatulong kampyonato sa maong conference niadtong Dominggo sa Araneta Coliseum.
Daghan man gud ang nagtuo nga paabton og Game 7 ang serya kay permi mang gisugwakan sa mga dumadapig ang matag duwa.
Mao nga kon mosangko kini ngadto sa deciding match modako ang kita sa PBA ug matapakan ang nangaging mga duwa nga pulos gipanglangaw.
Wa kapugngi ang Beermen sa ilang dominasyon sa series. Hinuon nakabintaha sila sa tapad ilabi na kay gihamok man sa injuries ang Ginebra. Napapas na gyud ang mga pagduda nga scripted ang series.
Pildi man tuod, pero usa ka positibong butang ang napakita sa Ginebra niining ubos karon sa pagdumala ni multicoach Tim Cone. Dili na sila whipping team sa PBA sukwahi sa nanglabayng katuigan nga halos maglisod gani og sulod sa playoffs.
Ari ta sa NBA. Dunay kaguliyang nga mihamok karon sa Los Angeles Lakers nga maoy usa sa mga rason kon nganong nagkayamukat kining agi karon sa usa sa mga respetado ug multi-titled team sa NBA.
Dunay power struggle tali sa mga managsuong Buss nga maoy manunonod sa team human mamatay ang ilang amahan nga si Jerry Buss niadtong Pebrero 2013.
Sa niagi man gud nga duha ka semana, gilahugay ni Jeanie Buss ang management sa Lakers pinaagi sa pagpalagpot sa iyang igsuon nga si Jim isip vice president sa basketball operations.
Iya usab nga gitangtang ang ilang karaan na kaayong general manager nga si Mitch Kupchak ug gipuli ang kanhi inila nilang star player kaniadto nga si Earvin “Magic” Johnson isip presidente sa basketball operations.
Tulo ka adlaw human sa lahugay, ang laing igsuon nga si Johnny uban ni Jim midangop sa korte aron mapalagpot si Jeanie kinsa nasagmuyo kaayo sa gibuhat sa duha.
Pinaagi sa iyang abogado, nagtinguha karon si Jeanie nga makakuha og temporary restraining order gikan sa korte aron mapugngan kining laraw sa iyang managsuon nga .magpili og mga bag-ong board of board of directors.
Dili kaha mapugos na lang sila sa pagbaligya niini aron pagsulbad sa kagubot? Kini maoy dakong posibilidad.