ABAY ATHLETE OF THE YEAR
Kinsa’y labing dominanteng magduduwa sa baskeball sa Pilipinas sa kasamtangan? Bisan kinsa nga basketball
fan ang pangutan-on niini, seguradong usa ra’y tubag: JuneMar Fajardo.
Usa ka 6’10” nga higante nga yanong makamaniubra sa ilawom nga bahin gamit ang iyang footwork ug makatira sab sa perimeter, ang lumad nga taga Pinamungajan, Cebu nanghakot og mga pasidungog sa Philippine Basketball Association (PBA) gumikan sa iyang abilidad.
Kagahapon, laing pasidungog ang nakolekta sa gitawag og “The Kraken” o “Abay” human siya natudlo isip Athlete of the Year sa 35th San Miguel Brewery-Sportswriters Association of Cebu (SMB-SAC) Sports Awards sa SM City-Cebu.
Ang SAC mitunol kang Fajardo sa prestihiyusong pasidungog gumikan kay hapit na niyang matupngan ang rekord sa PBA nga gituohan sa kadaghanan nga dili mahitabo.
Ang produkto sa University of Cebu (UC) Webmasters nakakulit og kasaysayan sa PBA sa miaging tuig dihang nakalangkat kini og Most Valuable Player (MVP) award sa ikatulong sunodsunod nga higayon. Siya’y ra’y nakabuhat niini.
Ang PBA legends nga sila si Ramon “El Presidente” Fernandez ug Alvin Patrimonio nakalangkat man tuod og upat ka MVP awards apan dili kini sagunson.
Hayag ang poruhan nga matupngan ni Fajardo ang rekord nila ni Fernandez ug Patrimonio human sa maayo niyang gipakita sa bag-uhay lang nahuman nga Philippine Cup.
Ning maong torneyo diin nakuha sa Beermen ang ikatulo nilang sunodsunod nga Philippine Cup title ug ika23 sa kinatibuk-an, nabira ni Fajardo ang Best Player of the Conference (BPC) award.
Kini maoy ikalimang BPC award ni Fajardo sulod sa 10 ka mga komperensiya. Natablahan niya ang kanhi sakop sa Beermen nga si Danny Ildefonso, kinsa nagduwa sa PBA sulod sa 17 ka mga tuig.
Kon dili maangol si Fajardo, nalantawang padayon kining modominar sa liga kay nagedad pa lang kini og 27.
Sii Fajardo nakabira na og upat ka mga kampiyunato sa PBA gawas sa nahakot niyang
individual awards. / Pooled report