NO STICKER, NO ENTRY IPATUMAN SA TERMINAL

Ipatuman na sa Cebu South Bus Terminal (CSBT) ang dili pagpasulod sa mga bus ug mini-bus nga wa’y sticker nga gikan sa Kapitolyo.

Kadtong mga bus nga kolorum o wa’y klarong papeles, dili mahimong makakuha sa mao nga sticker.

Samtang nagkaduol na ang Semana Santa, nihimo na sa inisyal nga mga pagpangandam ang CSBT, subay sa naandan nga tingsakay diin ang mga tawo nagtinguhang makapauli sa kalungsuran.

Lakip niining maong mga pagpangandam ang pagsiguro nga diha pa lang sa terminal, wa na’y kolorum nga mga bus ug mini-bus nga makasulod.

Kini aron masiguro usab ang accountability sa mga operator kon dunay mga kakulian nga mahitabo.

Matod ni CSBT operations manager, Joey Herrera, nga kadtong mga unit nga nakasumitir sa ilang opisina sa kopya sa insaktong mga dokumento, mao ra’y makadawat og sticker gikan sa Kapitolyo, nga magmatuod nga lehitimo sila nga mga unit.

Una nang nauyunan ang maong paagi dihang nipatuman og konsultasyon si Gobernador Hilario Davide III tali sa mga tagdumala sa terminal ug mga bus ug mini-bus operator.

Laing pagpangandam nga gihimo sa CSBT alang sa pagdagsa sa mga pasahero karong holy week, mao ang pagbutang ug mas klaro nga mga karatola labot sa loading bay sa mga bus nga mobiyahe sa nagkadaiyang destinasyon.

Matod ni Herrera, importante ang mga karatola aron mahibalo dayon ang mga pasahero kon asa sila molinya ug magpaabot sa ilang bus.

Ang mga mobiyahe sakay sa mini-bus ug mga bus paingon sa Carcar, Sibonga, Argao ug uban pang bahin sa habagatang Sugbo, ari mo-agi sa Entrance 1 duol sa E-Mall.

Kadtong mga paingon sa Pinamungajan ug Toledo o sa ubang bahin sa southwestern Cebu, kinahanglang adto moagi sa Entrance 2 duol sa Land Transportation Office.

Sa laing bahin, konsultahon una sa tagdumala sa CSBT ang kapulisan labot sa mga butang nga i-dili sulod sa terminal.

Matod ni Herrera, nga gihan-ay pa karon ang security measures nga ilang ipatuman sa pagdagsa na unya sa mga pasahero sa holy week.

Gawas sa mga hait nga mga butang sama sa kutsilyo ug gabas ingun man mga armas, buot sayran sa CSBT management kon unsa pa ang mga butang nga dili mahimong dalhon sulod sa terminal ug sa mga bus, aron pagsiguro sa kaluwasan sa publiko.

Gipadayag ni Herrera, nga posibleng lakip sa mga idili ang mga puthaw nga sama sa mga gamit sa konstruksiyon. /