Kanhi presidente sa IBP giatake sa kasingkasing, patay
Si kanhi Integrated Bar of the Philippines (IBP)-Cebu City chapter president Hidelito Pascual namatay kagahapon sa alas 4 sa kaadlawon human siya giatake sa kasingkasing. Siya 70 anyos.
Si manlalaban Elaine Mae Bathan, kanhi IBP Cebu City chapter chair, nikompirmar sa kamatayon ni Pascual sa
iyang Facebook post. “It is with great sadness and grief that I announce the passing of our IBP Cebu City chapter president and fellow ManLaw Atty. Hidelito Pascual. He joined our Creator at 4:00am today after he was rushed to the hospital yesterday (Monday),” matod sa Facebook post ni Bathan.
Si Pascual napili nga presidente sa IBP Cebu City chapter niadtong Pebrero 2015, hulip kang Bathan, ang IBP Eastern Visayas governor. Si Pascual maoy management representative sa Central Visayas Tripartite Wages and Productivity Board ug nagtrabaho sud sa 20 ka tuig isip executive sa Atlas Consolidated Mining and Development Corp. sa Toledo City.
Siya usab nagsilbeng consultant ni kanhi Mandaue City Mayor Jonas Cortes ug nagsuwat og sports column sa usa ka lokal nga mantalaan.
Nakahuman si Pascual sa iyang pagtuon sa abogasiya sa University of the Philippines. Nagtudlo siya sa University of San Carlos-College of Law sa wa pa siya moserbisyo isip legal ni Cortes.
Sila si manlalaban Fillmore Gomos ug Rameses Villagonzalo nakahinumdom kaniya nga maayong magtutudlo. / Sunstar Cebu