1 PATAY, P.8 M DRUG SAKMIT

KAMPANYA BATOK ILEGAL NGA DRUGA SA SUGBO PADAYONG GIHIGPITAN

Usa patay ug dul-an P800,000 nga kantidad sa shabu ang nasakmit sa managlahing operasyon sa kapulisan batok sa ilegal nga drugas sa dakbayan ug lalawigan sa Sugbo.

Samtang napulo ka mga suspek ang nasikop lakip ang igsuon sa sinaligan ni Jeffrey “Jaguar” Diaz.

Sa lungsod sa Cordova, patay ang usa ka drug pusher nga naila nga ikaupat sa lista sa high-value target sa maong lungsod.

Patay sa pinusilay sa kapulisan si Ricardo “Ading” Ando human kini misukol sa kapulisan atol sa buy-bust

operation sa Sitio Ube, Barangay Cogon, Cordova.

Alas 12:55 sa udto niadtong Sabado dihang gihimo ang operasyon diin nipabuto si Ando ngadto sa kapulisan hinungdan nga nisukol ang operatiba.

Nadala pa sa Lapu-Lapu City District Hospital ang suspek apan gideklarar kini nga patay.

Nasakmit gikan kani ang .45 nga piston, magazine, karton sa mga bala, walo ka pakete sa shabu nga nagkantidad og P2,000 ug nagkadaiyang basiyo sa .45, .9mm, ug .56mm

Sa dakbayan sa Sugbo, nasikop si Rodrigo Delfin, 44, igsuon ni Joselito “Otik” Delfin Arellano, ang sinaligan nga escort ug body guard ni Jaguar.

Pinangulohan sa City Intelligence Branch (CIB) ug City Drug Enforcement Unit (CDEU) ang maong operasyon sa Sitio Pundok Gami, Barangay San Nicolas, dakbayan sa Sugbo niadtong Sabado sa hapon.

Ang operatiba nihimo sa operasyon niadtong Sabado pasado alas 5:00 sa hapon diin nasakmit nila ang usa ka gamay, medium ug duha ka dagkong pakete sa shabu.

Anaa kini'y gibug-aton nga 55.04 gramos diin nagkantidad kini og P649,472 base na usab sa Dangerous Drugs Board (DDB) value.

Samtang laing drug pusher usab ang nasikop sa dan Belgium, Barangay Suba kagahapon sa hapon.

Ang nasikop naila nga si Elzalde Aro, 38 kinsa nakuhaan og shabu nga nagkantidad og P91,400.

Sa dakbayan sa Lapu-Lapu, nasikop sa kapulisan ang mag-inahan sa buy-bust sa New Paradise, Barangay Pajo, sa alas 2:00 sa hapon.

Naila ang mga suspek nga sila si Nilda Briones Rulida, 54, ug Alfredo Briones Rulida Jr., 30, kinsa nakuhaan kini og 50 ka gagmayng pakete sa shabu.

Aduna'y gibug-aton nga duha ka gramos ang nasakmit diin nagkantidad kini og P23,600.

Sa dakbayan sa Naga nasikop usab ang unom ka mga tawo atol sa buy-bust.

Lakip sa nasikop sila si Renato Flores Villarin, 47; Ritchie Lara Suarez, 48; Arnel Secuya Generalao, 34; Ronald Navales Villarico, 52; Chebong Barawidan Canada, 25; ug Dexter Quijano Cañete, 19.

Walo ka pakete nga shabu ang nasakmit kanila.

Natanggong karon ang mga nasikop sa prisohan ug gikatakda nga pasakaan kini og kasong kalapasan sa Republic Act 9165 kun ang Comprehensive Dangerous Drugs Act karong adlawa. /