CEBU CITY GIHATAGAN OG PASIDUNGOG SA EMB

Gipasidunggan sa Department of Environment and Natural Resources (DENR), pinaagi sa Environmental Management Bureau (EMB), ang Cebu City Government atol sa national

conference sa sharing of good practices and presentation sa ASEAN Model Cities Phase III sa Dipolog City niadtong Marso 30. Ang dakbayan sa Sugbo nakadawat og plaque of recognition nga gitunol ni Assistant Secretary Corazon Davis sa DENR ug Director Jacqueline Caancan sa EMB, gumikan sa maayong mga programa pagdumala sa kalikupan.

Si Konsehal Joel Garganera, chairman sa committee on

environment sa konseho, wa makatugkad kon nganong gihatagan ang dakbayan sa pasindungog.

Matod sa konsehal, grabe kahugaw ang mga sapa sa sentro sa siyudad ug bisan sa mga

emission testing center sa siyudad, 80 porsiyento gihapon sa mga sakyanan ang kusog mobuga og aso.

“Probably, we got the recognition because we now spent P10 million more per month in disposing our garbage from P15 to P26 million a month,” padayag sa konsehal.

Gipadayag ni Garganera nga dili matagamtaman sa katawhan ang maong pasidungog apan iyang gipadayag nga ang malungtaron nga kalikupan katungdanan sa matag indibiduwal ug kinahanglan kining ipadayon.

Ang konsehal wala nibutyag kon si kinsa ang iyang gipikhan apan, si Mayor Tomas Osmeña nakabangga niya bahin sa Inayawan landfill./