Welcome ASEAN delegates!
Magsugod karong adlawa ang Association of Southeast Asian Nations (ASEAN) Summit sa Sugbo. Gatosan ka delegado nga maglakip sa ilang mga pamilya nia sa Sugbo sa mosunod nga lima ka adlaw.
Sanglit usa ka kini ka internasyonal event, hugot nga seguridad ang gisugdan na pagpatuman. Sayo sa miaging semana nakuyog ko sa grupo ni Sr. Supt. Joey Salido ang luyoluyong direktor sa Aviation Security Group sa PNP, nga naghimo og inspection sa tanang suok sa Mactan Cebu International Airport.
Ang grupo gilangkoban sa mga experto sa bomba ug K-9 unit. Si C/Supt. Noli Taliño ang over-all commander sa security, nipahibawo nang daan nga subra sa tres mil ka tawo ang gitahasan alang sa luwas nga pagpahigayon sa mga tigom dinhi sa ato.
Ang militar, suma ni Centcom Spokesman Lt. Col. Luzmindo Mamauag, dunay subra 400 ka sundalo nga ipailawom ubos sa kamanduan ni Taliño. Di lang sundalo ug pulis ang gitahasan apil kadtong mga tawo nga experto sa panglawas ug mga katalagman nga apil nga gikonsiderar.
Bitaw, kay kining linog, bagyo ug sunog di man nato matagna kanus-a mahitabo. Busa di maayong mokompiyansa.
Hinuon kay di man bag-o sa Sugbo ang pag- host ug mga international event makalaom kita nga di magkatibulaag kining mga tawo nga gitahasan sa security kon may hulga nga mahitabo. Matod sa usa ka security guard nga si Mona Lisa Oposa ang seguridad sa mga delegado trabaho natong tanan. Busa apil kita nga magpakabana.
MASAPIAN
Gawas sa lamian nga litsong baboy nga i- supply isip kabahin sa menu sa mga delegado ug sa ilang pamilya unsa pa ma'y laing masapian sa atong mga kaigsuonan samtang nia ang mga delegado sa ato?
Ang mga namaligya og souvenir items duol sa Cebu City Hall nga akong nahinabi naglaum nga sama sa niaging 2007 ASEAN Summit sa Sugbo may mga delegado unta nga masuroy ug mamalit sa ilang baligya.
Ang mga taxi driver nagtuo hinuon nga sama sa ilang kasinatian sa nakalabay nga Asean Summit mura'g hanap nga sila masakyan.