Solusyon sa mga problema
Kon maminaw kas radio, maglibog kag unsay imong tumaron aron mamaayo ang imong balatian ug suliran sa panglawas.
Dunay mga tambal nga gipasiatab nga makaayo sa tanang mga sakit gikan sa rayuma, diabetes, high blood, mga cancer, sakit sa atay ug uban pa.
Sa Ininglis, gitawag kining og panacea. Usa ra ka tambal apan makaayo sa tanang mga sakit. Wa ka nay angay nga kabalak-an pa.
Dunay koy amigo nga walay sakit apan nipalit na ning maong mga herbal medicine kay matod pa niya, naayo man gani ang masakiton, siya pa kaha nga way sakit nga iyang gibati.
Apan unsa kaha kon ang tambalan mao ang mga balatian sa atong nasod nga sama sa hubag nga nag-umido ug mga lutahan nga nagngulngol sa kasakit?
Usa ka taho sa Agence France Presse (AFP) nag-ingon nga nitanyag si Presidente Rody Duterte sa pagbalik ngadto sa usa ka authoritarian
rule kon sa usa ka diktadoriya aron pagsulbad sa mga suliran sa Pilipinas nga wa masulbad sa demokrasya human sa tulo ka dekada gikan sa pagpalagpot sa usa ka diktador.
Apan unsa man kining maong mga suliran? Wa na bay laing mga makasulbad kanila? Kinahanglan ba gyud nga mobalik kita sa mangitngit nga anib sa atong kasaysayan?
Di kaha nga ang authoritarian rule, ang diktadoriya, mas grabe pa unya sa mga balatian nga tambalan niini?
Matod sa taho sa AFP, si Presidente Duterte niingon nga hayan kinahanglan ang martial law aron pagsalbar sa mokabat sa usa ka gatos ka milyon ka mga Pilino gikan sa illegal nga drugas, kriminalidad ug terorismo.
Pero, kon imong sutaon, warning lang kini sa presidente. Bisan pa tuod kon sa kadaghang higayon, niingon na siya nga way makapugong kaniya sa pagdeklarar og martial law kon gusto niya. Bisan ang Kongreso ug ang Korte Suprema di makapugong kaniya.
Kon ikaw maoy lider sa usa ka nasod, mas ganahan ka kon ikaw ray magbuot. Way magsamok-samok nga Kongreso, di sab ka mabaraw sa Korte Suprema nga maoy mo- interpret sa mga balaod. Sanglit ikaw man maoy magbuot, dali ra kaayo nimong ilisan ang balaod nga di nimo gusto.
Sa ato pa. Unsay imong pulong, mahimong balaod. Sa ginaingon pa, ang diktadoriya mao ang labing maayong sistema sa pang-gobyerno, kana kon ikaw maoy diktador.