See you in my heart
Nanglabay ang daghang ga adlaw. Last year na nako sa college. Mo- graduate na gyud ko. Ug unya, mosulod na ko sa monasteryo. Ingon man ani ang kondisyon nga gipangayo nila ni Mama ug Papa nako. Mosugot sila nga magmadre ko apan kinahanglang mohuman una ko og kurso. Wa ko sila pakyasa. Nagtinarong kog eskuwela.
At the same time, nagpadayon ko sa pag-alagad sa simbahan. Nagpadayon ko sa pag- lector nga mao ang tigbasa sa mga pulong sa mga propeta nga naghisgot sa Diyos. Malipayon ug komportable ko ani kay nabatyagan ko nga duol na gyud ko sa Ginoo. Wa na ko maghunahuna sa kalibutanong kalipay, parehas sa pagpakig- boyfriend. Nuon, wa gyud ko malimot kang Randy. Dugay na sab ang panahon nga wa mi magkita.
Kanunay kong giampo sa Diyos nga unta mawala na sa hingpit si Randy sa akong kasingkasing, Hipokrita ko kon di ko angkunon sa akong kaugalingon nga bisan sa taas nga panahon nga milabay, gipitik gihapon si Randy sa akong kasingkasing. True love gyud tingali ang gibati ko niya kay mahinumdoman man gyud nako siya labi na kon mag-inusara ko.
Duna gani mga gabii nga di ko makatulog tungod niya. Apan gilig-on ko ang akong kaugalingon. Nagtuo ko nga usa lang gyud ka pagsukod sa Diyos nako kining tanan. Nuon, wa man sab mawala sa akong hunahuna ang giingon ni Carol nako nga kon kami gyud si Randy ang gitakda sa kapalaran, mahitabo gyud kini ug di ko angay mabalaka kay kagustohan sab kini sa Diyos.
Apan dako gyud ang akong tinguha nga mahimo kong hingpit nga madre.
Usa ka buntag sa Domingo, summer vacation na sab niadtong tungora, nakita ko si Randy nga naglingkod duol sa altar sa gialagaran kong simbahan. Nadiyong ang akong panan-aw nga mitutok kaniya pag-ayo. Mikusog pagkuba ang akong dughan. Morag mihangos ko kay nakalitan man gyud ko. Nganong nia manimba si Randy sa simbahan nga akong gialagaran? Wa gyud nako kapugngi nga nakapangutana ko sa akong kaugalingon.
Karon pa kini nahitabo. Unya gipangita ko sa akong panan-aw si Sandra. Apan nalukop na lang nakog tan-aw ang mga tawo nga nanimba. Wa gyud nako makita si Sandra.