Gipahimungtan

Dear Papa joe,

Tawaga lang ko og Teressa, 44 anyos, taga Negros pero naa ko diri karon sa Cebu nagtrabaho isip katabang. Maayo man ang akong mga amo. Kining akong suliran kabahin ni sa among silingan nga nahimong amo sa akong amiga nga silingan ra namo. Ang akong amiga man gud nisibat kay wala makauyon sa iyang amo kay halos na di pakan-on kay di mag salin para sa iya mao nga nisibat. Karon kay ako may gibweltahan sa iyang amo kay nagpataka daw ko og introduce og katabang nila nga molayas wa gani magpasidaan daw nga mohawa ug nagkabuang daw sila kay nangabsent nalang daw sila sa ilang trabaho kay walay mobantay sa ilang anak.

Karon sige sila og pangaway nako kay ako kunoy hinungdan nga naundang nalang ang usa nila og trabaho. Giingnan pako nila na ila daw ko pasakahan og kaso. Mao niy problema nako karon kay nahadlok ko kay pobre ra baya ko. Mao ni akong problema karon ug tambagi intawn ko.

TERESS Teressa,

Para nako wala lang na silay kapahimungtan sa ilang kalagot sa napagan ilang trabaho tungod sa paglayas sa ilang katabang. Ayaw lang kahadlok, sigurado ko nga tabangan ka sa imong amo ana kay kon di ka nila tabangan, basin ikaw pa ang mohawa ug mopalayo. Mapagan pa sad ilang trabaho.

Bitaw, unsa man say ikiha nila nimo nga di man ka agency? Nahulog ra man to na referral. Maynta nangawat ka sa ilang mga butang, wa man. O di ba kaha konsabo ka ug naa silay ebidensya kay mapagan ka.

Kon diskompyado sila, di ingnon nimo nga adtu-a nila sa inyohang lugar para makabalo sila unsay hinungdan nganong nilayas ang ilang katabang. Ingna sila nga ikaw igo ra nga ni refer nila sa imong silingan. Ana lang.

PAPA JOE