Grand opening sa Palm Grass Hotel giatol sa Tres de Abril Uprising
Atol sa 119th anniversary sa Battle of Tres de Abril, ang Palm Grass, The Cebu Heritage Hotel mosaulog sa iyang grand opening: “Engrandeng Pag-abri sa Palm Grass” karong adlawa, Abril 3, 2017, alas 2:00 sa hapon ngadto sa alas 8:00 sa gabii sa Hawanan Tres de Abril ug Kapihan ni Lumaya.
Sumad karong adlawa, 119 ka tuig ang nakalabay, ang 1898 Cebu Revolution batok sa mga Espanyol gilusad sa kapin sa 2,500 ka mga Sugbuanon maisugong nakigbisog sa 1898 Battle of Tres de Abril nga gipangulohan ni Leon Kilat.
Usa ka adlaw sa wala pa ang engkuwentro, Abril 2, 1898, ang Talisay Katipuneros ubos sa pagpangulo sa mga managsuong Aliño, nakig-away sa mga Espanyol sa Talisay.
Isip bugtong heritage hotel sa Sugbo, ang Palm Grass nihingalan sa mga hawanan, andana, ug mga lawak sa pagyukbo sa Cebu Katipunan leaders ug ubang lider sa kasaysayan sa Sugbo.
Sa grand opening, dunay sagang kalihokan sama sa pagduwa sa Battle of Tres de Abril, pag- review sa libro nga “Leon Kilat (The Untold Story of the 1898 Cebu Revolution Against Spain),” pagbukas sa kahoy nga imahen ni Leon Kilat, rondalla, poetry reading, ug guided tour sa hotel. Dunay libre nga cocktails alang sa guests ug dinner buffet nga P399. Kini nga kalihokan dunay
special door prizes ug makadawat og libre one night stay usa ka lawak sa hotel. Ang Palm Grass Hotel sa 68 Junquera St., Barangay Kalubihan, siyudad sa Sugbo.