PAGLAOM SA BULLS MIAMAG
Miamag ang poruhan sa
host Chicago Bulls nga makakumpayot og luna sa nagkaduol nga playoffs human nila gisungag ang Atlanta Hawks, 106-104, kagahapon sa National Basketball Association (NBA).
Ang Bulls nakapugos og three-way tie sa 37-39 nga rekord kauban ang Miami Heat ug Indiana Pacers alang sa inilugay katapusang duha ka luna sa playoffs alang sa Eastern Conference.
Apan mas maayo ang posisyon sa Bulls ug nahiluna sila sa ikapito samtang ikawalo ang Heat ug ikasiyam ang Pacers. Ang Bulls nakabintaha kon ika- tie break nila ang Heat o Pacers inig human sa regular season.
Kon makasulod sa playoffs ang Bulls, hayan posible pang makaduwa og balik ang usa sa ilang mga sinaligan nga si Dwyane Wade, kinsa padayon pang nagpaalim sa angol sa iyang siko.
Sa pagkaangol ni Wade niadtong Enero 25, daw taphaw na ang poruhan sa Bulls apan nasugakod nila ang mga pagsuway ug hayag na ang tanan aron sila makaabante sa playoffs. “We’re not stopping at 7,” matod ni Bulls pointguard Rajon Rondo. “We have a nice schedule ahead of us. We take care
of what we need to take care of, we’re trying to move up even more.”
Ang Bulls gipangulohan ni Jimmy Butler pinaagi sa iyang 33 puntos lakip na ang importanteng duha ka freethrows sa nahabiling 2.1 segundos samtang nidugang si Rondo og 25 puntos.
Si Bulls coach Fred Hoiberg mohatag unta og taastaas nga oras kang Butler aron makapahuway apan miinsister si Butler nga kaya pa niyang mokombati.
“No disrespect to my teammates or anything, but Fred was like, ‘Hey Jimmy, you tired?’ I was like, ‘No, I want to play. I want to be the reason we win,’” batbat ni Butler.
“So he was looking out for me, telling me we had another one (Sunday). But I told him, ‘I’m not worried about (Sunday). I’m worried about the right now.’ So whatever they need for me to do I’m going out there and I’m doing it.’’
Ang Hawks nagpabilin sa ikaunom nga dapit sa East bisan sa kapildihan nga nagpaus-os sa ilang rekord ngadto sa 39-37.
Gipangulohan ni Dennis Schroder ang Hawks pinaagi sa iyang 29 puntos samtang nihatag og 20 puntos si Tim Hardway Jr. /