MAPAKYAS PAGBAKUNA SA IRO, IRING PASILUTAN
Gitun-an sa Mandaue City Veterinary Office (CVO) ang posibilidad nga isyuhan og citation ticket ang iresponsable nga mga tag-iya og binuhi nga mga hayop human sa kamatayon sa usa ka 7 anyos nga batang lalake sa Brgy. Paknaan, dakbayan sa Mandaue.
Nasuta sa Superbalita Cebu nga duha ang gituohang namatay tungod sa rabies infection sa dakbayan sa Mandaue: usa niini sa Brgy. Canduman samtang ang usa sa Paknaan.
Wa pa hinuoy kompirmasyon sa hinungdan sa kamatayon sa duha ka mga biktima sanglit nagpaabot pa ang CVO sa resulta sa test kon may rabies ba ang iro sa Paknaan.
Dugang sa CVO nga buhi pa sab ang iro nga nakapaak og babaye sa Canduman.
Si CVO head Karen Merilles nagkanayon nga nakigkoordinar na sila sa Cebu City Veterinary office kon makahimo sa pagpahamtang og citation ticket ngadto sa mga iresponsable nga pet owners nga wa atimana ug pabakunahi ilang mga binuhi.
Atol sa press conference kagahapon, si Merilles nagkanayon nga adunay taas nga insidente sa mga napaakan sa iro sa Mandaue City nga delikado sa publiko ilabi na nga nagsingabot ang summer.
Dugang niini nga sa ilang plano, ang mga nanag-iya og iro o iring nga pakyas sa pagparehistro sa ilang mga binuhi maoy pahamtangan og citation.
Gusto sa dakbayan nga adunay pinugsanay nga pagparehistro ug pagbakuna sa mga iro.
Base sa usa ka balaudnon, ang pakyas sa pagbuhat niini masagpaan og P2,000 nga multa.
Base sa statistics gikan sa city health department, sobra na sa 100 ka mga tawo ang nangayo og anti-rabies injection human mapaaki sa iro ug iring.
Niadtong Marso 8, ang 7 anyos nga si Joshua Andy Durias namatay human napaakan og iro nga dunay rabies sa ilang silingan.
Niadtong Enero, di mominos sa 22 ka mga tawo ang napaakan sa iro nga may rabies sa Brgy. Casuntingan.
Ang iro gihulagway nga buang, sumala pa sa mga napaakan niini.
Na-indyeksyonan na og antiang mga napaakan. /