80 ka tawo sa aseras, apil mga bata, ang 'naluwas' sa gobyerno
Di momenos 80 ka mga tawong libud suroy kinsa mangatulog lang sa asiras ang na- rescue sa hiniusang pwersa sa Cebu City Anti Mendicancy Board (CCAMB), barangay tanod ug GAD focal person sa mga barangay.
Si Raquel Bohol-Arce, pangulo sa operasyon, nibutyag nga atol sa duha ka gabii nilang operasyon, nagsagol ang ilang na-resuce, gikan sa mga bata, edaran ug mga tiguwang palibot sa Cebu City Hall partikular duol sa Plaza Independencia.
Ang mga ma-rescue sa CCAMB ilang ipahimutang sa kanhi Cebu City Abattoir sa North Reclamation Area.
Apan ang uban gihulagway ni Arce nga mosibat ug di na mobalik apan ila gihapon kining masakpan sa ilang mga operasyon sanglit abli ang gate.
Gipasabot ni Arce nga ilang gihingusgan ang pag-rescue sa mga night dwellers dili tungod sa ASEAN summit kon di ilang gipahimuslan ang programa sa Department of Social Welfare and Services (DSWD) nga giulohan og “food for work” diin ang mga makatrabaho makadawat og libreng pagkaon.
Matod ni Arce nga karong adlawa mopahigayon sila og tree planting sa barangay Malubog ug Budlaan pinaagi sa mga night dweller.
Makadawat sila og unom ka kilong bugas ug mga de-lata matag adlaw nga molanat og tulo ka adlaw.
Apan gipayag sa pangulo sa CCAMB nga kon magsige og uwan, di sila mahinayon sa tree planting ug ang paglimpyo sa kanhi City Abattoir maoy ilang rumbohon.
Gipasalamatan sa CCAMB ang mga tanod, GAD focal representative sa barangay Sto. Niño, Lahug, San Roque, Carreta kinsa aktibo sa maong kalihukan bisan kon wala pay honorarium gikan sa siyudad.