QUISUMBING MIHANGYOG TOW TRUCK SA BOARD

Human sa aksidente sa Marcelo Fernan Bridge nga nakapabara sa trapiko sa Mandaue niadtong Martes ug Miyerkules, pabor si Mayor Luigi Quisumbing nga pabutangan og duha ka towing truck ang ilawom sa duha ka taytayan sa Mactan.

Sa dihang nahinabi sa mga tigbalita kagahapon, si Quisumbing nagkanayon nga ang maong sugyot sa milabayng Septembre pa niya gihangyo atol sa ilang meeting sa MactanCebu Bridge Management Board.

Saysay ni Quisumbing nga kini maoy iyang gikahadlukan sukad nga nahimong mayor nga may aksidente sa taytayan nga makabara sa trapiko sa tibuok Metro Cebu.

Siya niingon nga ang epekto sa maong sitwasyon nasinati human sa sunodsunod nga aksidente sayo ning semanaha.

“We hope that the bridge board will consider our request so that in case anything happens we can immediately pull out any vehicles that are obstructing the bridge before the traffic builds up,” sumala pa sa mayor.

Giangkon sa mayor nga ang mga naaberiya o naaksidenteng sakyanan sa dakbayan mao ang hinungdan sa paghuot sa trapiko kon dugay kini makuha.

Matod ni Quisumbing nga may mga towing truck ang Mandaue apan di kini makadaug og dagko nga mga truck kon maaberiya.

“Unfortunately, all of our existing tow trucks in the city are meant for light vehicles. Anything up to a pick up truck, we can probably haul. Beyond that kanang mga elf, container trucks even buses are beyond the capabilities that we currently have sa City,” ni Quisumbing.

Kon mabutangang ug usa o duha ka towing truck ang taytayan si Quisumbing niingon nga andam siya nga pabutangan ug kawani ang mga towing truck aron dali nalang unya sa pagkuha ang mga nakaaling sakyanan sa dalan.

Gipasabot sa mayor nga wa na sa huridiskyon sa Mandaue ang taytayan maong bisan kon mopalit sila og towing truck, moagi gihapon sila sa bridge board alang sa clearance niini. /